Pjesë e diskutimit të kryeministrit Rama me përfaqësuesin e Jashtëm të BE, Borrell, ka qenë integrimi i Shqipërisë në BE. Kreu i qeverisë shqiptare, Edi Rama, e cilëson këtë proces integrimi si dasmë, ku BE nuk është ende gati, duke thënë se në Shqipëri “nuk ka krushk që anulon dasmën, se jemi në dashni të madhe me Europën”. Ai tha se vendi ynë do të jetë në pritje deri kur BE të jap dritën jeshile për negociatat.
“Po ti shkoj këtu, nuk ka krushk që anulon dasmën se jemi në dashni të madhe me Europën. Kjo forcë na bën që ne të jemi gati për tu martuar, dhe kur BE të thotë jam dhe unë gati dhe nuk do të mjaftohet vetëm me “ne ju duam shumë, por s’kemi kohë të flasim bashkë”. Flitet për bisedime për martesë, dhe mendoj se shqiptarët janë për t’u dashur”, tha Rama.
Përfaqësuesi i Lartë i BE-së për Punët e Jashtme dhe Politikën e Sigurisë, Zv.presidenti i Komisionit Evropian, Josep Borrell, ka thënë se Shqipëria i ka përmbushur kushtet për çeljen e negociateve të anëtarësimit në Bashkimit Europian.
“Unë e di që Shqipëria e ka treguar qartë se është një ndër partnerët më të afërt të BE, Shqipëria ka konfirmuar angazhimin e saj për sigurinë ndërkombëtare. Dua të falenderoj Shqipërinë si anëtare e OKB, e cila ka qenë bashkëpenëmbajtëse e rezolutës kundër Rusisë që iu bë në arenën ndërkombëtare.
Është aleate e jona e NATO-s dhe po ashtu ofruese e sigurisë, ju jam mirënjohës për kontributin për mbrojtjen në botë. Ne do të vazhdojmë bashkëpunimin për të luftuar kundër dezinformimit dhe unë propozoj të ketë burime të reja për të rritur sigurinë në rajon.
Ne jetojmë në momentet që të qenurit bashkë është më e rëndësishme se më parë. Ju kryeministër keni thënë se nuk na duhen fjalët, por veprat. Ka ardhur koha që të rijetësohet, procesi i integrimit dhe të riintegrohet Ballkani Perëndimor në BE.
Shqipëria i ka përmbushur tashmë me kohë të gjitha kushtet për çeljen e negociatave të anëtarësimit në BE. Unë do të mbështes çeljen e negociateve gjatë presidencës franceze. Jemi të gjithë të angazhuar në këtë këndvështrim. Dëshiroj që t’ju përgëzoj për shpejtësinë e reformave tuaja, sidomos në reformën në drejtësi”.
