Kryeministri Edi Rama e ka quajtur Ramush Haradinajn një gënjeshtar dhe të “paditur klasik”, pas deklaratave se samiti i tretë i “Mini-Shengenit” që po mbahet në Tiranë ka për qëllim heqjen e taksës ndaj mallrave serbe.
Ndër të tjera, Haradinaj theksoi se nëse Ramës i dhimbsen kosovarët, të largojë taksën e vendosur në Rrugën e Kombit.
Lidhur me këto deklarata, kreu i qeverisë iu drejtua Haradinajt me fjalët: “Ndërhyrje prej të padituri klasik që merret llokum dhe paraqitet mediatikisht. Si bëhet kjo, në çfarë forme bëhet? Nuk ka asnjë nyje detyruese kjo marrëveshje, Haradinaj është një gënjeshtar që gënjen sërish, nuk di nëse e bën nga padija, por se është gënjeshtar, pasi këtu nuk ka asnjë kusht apo detyrim”.
Në një komunikim për mediat, Rama u shpreh se kjo marrëveshje ka vetëm një qëllim: “Të zbatojë marrëveshjet e bëra më parë mes të gjitha vendeve. Unë dua që në këtë proces ne të fusim hap pas hapi edhe elementë të tjerë, që ka të bëjë me zhbllokimin e ngërçit për energjinë. Është një ngërç i madh, që nuk zgjidhet me sharje, fyerje. Kjo është një gënjeshtër sepse nuk ka asnjë lloj detyrimi në këtë aspekt.
Nëse Kosova hyn në këtë proces dhe thotë që marrëveshjen për lëvizjen e lirë për njerëzit, mallrat, kapitalet, unë nuk dua ta bëj me Serbinë, por me Maqedoninë e Veriut, nuk i thotë njeri gjë.
Ne nuk kemi ndryshuar asgjë në raport me qëndrimin solid të palëkundur, që Serbia duhet të njohë Kosovën. Por, jeta e përditshme na mëson se ka plot gjëra të tjera që mund të bëhen, dhe duke bërë gjërat e reja lehtësohet edhe procesi tjetër”, tha Rama.
