Teksa dy ditë na ndajnë nga seanca plenare e 10 shtatorit, pritet që kryedemokrati Basha të mbledhë grupin parlamentar të Partisë Demokratike dhe Kryesinë. Në thelb të këtyre mbledhjeve pritet të ketë diskutime mbi nisjen e sesionit të ri parlamentar, por edhe për qëndrimin që do të mbajë kreu demokrat sa i përket çështjes së ish-kryeministrit Sali Berisha dhe hyrjes së tij në Parlament. Në kohën kur PD-ja nuk ka një qëndrim zyrtar, ish-kryeministri Sali Berisha u shpreh i vendosur për të qenë pjesë e Parlamentit të premten.
Nga ana tjetër, kryeministri Rama dje mblodhi sekretariatin në selinë e Partisë Socialiste, ku në fokus të saj ka qenë organizimi i PS-së si dhe nisja e sesionit parlamentar. Rama ka kërkuar nga sekretarët që të nisin analizën për 25 prillin, duke analizuar të gjitha degët që çaluan me rezultatin.
Në një prononcim për mediat, pas mbledhjes së sekretariatit, Sekretari i Përgjithshëm i PS-së Damian Gjiknuri foli për herë të parë pas marrjes së detyrës, ku dha disa detaje sa i përket mbledhjes.
Gjiknuri u shpreh se në fokus të saj ishte riorganizimi i PS-së, si dhe përmbyllja e analizave të nisura nga Kongresi i PS-së. Sipas tij, PS-ja edhe pse ka një eksperiencë të madhe, ende ka probleme mbi të cilat duhet reflektim.
“Me fillimin e punës për riorganizimin e PS-së, ku së bashku me sekretarët e rinj do të fillohet një proces i vazhdueshëm, duke vazhduar me analizat dhe duke ristrukturuar PS-në për sfidat në mandatin në vazhdim.
Ky mandat është më i vështirë se është i treti. Qëllimi i afatit 100-ditor ishte pikërisht përmbyllja e analizave të nisura nga Kongresi, dhe lënia kohë PS-së për të përgatitur vizionin e ri dhe për të dalë me një platformë e cila do të dojë vite për tu implementuar”, tha Gjinkuri.
Sipas tij, analiza për zgjedhjet e 25 prillit do të zgjasë deri në fund të vitit, dhe viti tjetër do ta gjejë PS-në edhe me statut të ri. “PS-ja ka një eksperiencë të madhe, por ka pasur edhe probleme që duhet të reflektohen”, vijoi më tej ai. /Tirana Today
