Kryeministri Edi Rama ka deklaruar se Serbia duhet të ballafaqohet hapur me të kaluarën e saj në raport me Kosovën.
Sipas tij, përpjekja e Vuçiçit për të hapur këtë debat brenda vendit, ia lehtëson edhe më shumë këtë barrë si presidentit ashtu edhe vetë Serbisë.
Në një intervistë për gazetën beogradase “Blic” Rama vë në dukje se Serbia duhet të përballet në mënyrë frontale me të kaluarën dhe jo konvencionale. “Iniciativa e Aleksandar Vuçicit për ta nisur dialogun e brendshëm serb për Kosovën është një akt i lidershipit me të cilin ai e shpalosi një vizion kurajoz për të ardhmen e Kosovës dhe Serbisë. Kam respekt për iniciativën e tij që të ballafaqohet me të kaluarën në mënyrë frontale dhe jo konvencionale”, ka thënë Edi Rama, në intervistën e titulluar “E ndjej dhembjen dhe vendosmërinë e Vuçiçit për ta zgjidhur problemin e Kosovës”.
Sa i përket njohjes së Kosovës nga ana e Serbisë, kryeministri shqiptar, thotë pavarësisht se e ka të vështirë ta pranojë Kosovën si një realitet më vete, Beogradi një ditë do ta bëjë këtë. “Njohja e plotë e Republikës së Kosovës nga Serbia! Por, e di se kjo është më lehtë të thuhet sesa të bëhet kur e vendosi veten në këpucët e Aleksandrit. Prandaj, aktualisht zgjidhja është që të punojmë fuqishëm së bashku”.
Idenë e Ivica Daçiç për ndarjen e Kosovës Rama e konsideron si një “propozim jo konvencional”, ashtu siç është edhe bashkimi i Luginës së Preshevës me Kosovën, ose bashkimin e Kosovës me Shqipërinë. Qasjet e këtilla mund t’i diskreditojnë edhe qëllimet më të mira”.
“Zhurma rreth deklaratës për ‘bashkimin e Shqipërisë me Kosovën’ ishte një konkluzion trivial, e jo një plan, kërcënim apo dëshirë. Por, nëse mbyllet horizonti i integrimit të rajonit tonë në BE nuk është e vështirë të parashikohet rizgjimi i fantazmave nga e kaluara”, tha ai.
“Raportet e tashme mes Serbisë dhe Shqipërisë janë më të mira sesa që kanë qenë ndonjëherë”.
Gazeta e ka pyetur Ramën edhe për kohën kur ishte basketbollist, por ai përgjigjet në mënyrë diplomatike: “Nuk mund të jem aq kurajoz sa të them se kam qenë basketbollist derisa flas me një gazetar që vjen nga vendi i basketbollit. E kam dashur basketbollin si pjesë të rinisë sime. E dua artin si pjesë të dëshirave të mia. E dua politikën si pjesë të qenies sime”, ka thënë ai.
