Teksa Rruga e Arbrit është drejt përfundimit, kryeministri Edi Rama deklaroi se ky segment rrugor, do të jetë pa pagesë për qytetarët.
Në një intervistë për ”Report Tv”, Rama u shpreh se kjo rrugë po bëhet me PPP, pasi buxheti i shtetit nuk kishte mundësi për financim, si dhe do të duhet të priteshin disa vite për ndërtimin e këtij aksi.
Ndër të tjera, Rama u shpreh se Rruga e Arbrit do të sjellë një zhvillim fantastik për zonën.
Edi Rama: ”Kjo është një rrugë e cila bëhet me PPP për 2 arsye, së pari pasi në rast se do të shfrytëzonin buxhetin tonë do të ishte e pamundur dhe do të na duhej të spostonim shumë para nga të tjera programe të rëndësishme. Ose do të prisnim 13 vite për të bërë rrugë ose e bëjmë rrugën dhe e shlyejmë për 13 vite. Dhe arsye e dytë është se rruga do të jetë pa pagesë për njerëzit dhe mirëmbajtja do të kryhet nga kompania. Pra ne do të japim financim edhe për mirëmbajtje dhe njerëzit do ta kenë pa pagesë. Dhe autostrada Milot-Fier, e kombinuar me Milot-Muriqan, do të jetë me pagesë. Sigurisht e koordinuar me rrugë të tjera alternative”.
“Kjo rrugë dhe ajo e lumit të Vlorës janë dy akse fantastike të një Shqipërie që nuk e njohim, kam zbuluar këtë zonë, që për 99% e shqiptarëve do jetë një parajsë tokësore ku ka varfëri se ka pasur izolim të madh dhe ku mrekullitë e natyrës mund të kthehen në një aset fantastik për të zhvilluar turizmit. Pogromet zhvillimorë të këtyre zonave janë të hapura, ne do të kemi 5000 euro për çdo emigrant që investon në shtëpinë e babës apo gjyshit”.
