Këshilltari i pavarur i bashkisë Dibër, Astrit Ademi ka thënë se titulli “Qytetar Nderi” është simbolik dhe kryeministri s’mund ta refuzojë. Ai është i pari që propozoi titullin për kryeministrin Edi Rama, teksa shprehu mirënjohje për shkak të Rrugës së Arbrit.
Duke komentuar refuzimin e kryeministrit, Ademi tha se do ia cojnë titullin simbolik me postë. Po ashtu ai u shpreh se kur të përfundojë rruga e Arbrit, do i bëjë një bust Ramës me paratë e tij pasi kjo rrugë është shumë e rëndësishme për banorët e zonës aty.
“Kjo rrugë ka 28 vite që gënjejnë udhëheqësit dhe më në fund Rama e premtoi edhe unë i kam thënë shprehimisht që ‘Do ta na gënjesh edhe ti si gjithë të tjerët. Faktikisht ai nuk ka gënjeu. As kam bërë bisedë me stafin e kryeministrit, as më stafin e Bashkisë. Ajo ishte një ide personale e imja si këshilltar i pavarur. Është një mirënjohje e popullit të Dibrës për atë rrugë që ne e kemi pasur ëndërr. Unë do të thosha edhe një gjë tjetër për këtë, që ditën kur ta mbarojë do t’i bëj një bust Ramës, jo kryeministrit por Edi Ramës. Ku të jetë më i përshtatshëm do t’i bëj një bust me paratë e mia. Sepse është një tmerr të nisesh për Tiranë është tmerr për çdo dibran”, u shpreh këshilltar i pavarur në Bashkinë Dibër.
Zyra e Kryeministrit theksoi se Rama ka qenë, mbetet dhe do të jetë kundër titujve honorifikë për politikanët në detyrë.
