Kryeministri Rama tha sot në mbledhjen e Grupit Parlamentar, se Partia Socialiste do të nisë punën për zgjedhjen e Presidentit të ri të Republikës së Shqipërisë. Sipas kryeministrit Edi Rama, emri i presidentit do të zgjidhet nga Grupi Parlamentar i Partisë Socialiste, ndërsa shtoi se për sa u përket konsultimeve me opozitën, përplasja e tyre e brendshme i ka vështirësuar gjërat. Kryeministri Edi Rama shtroi mundësinë edhe të një emri gruaje si presidente, që do ishte e para në Shqipëri që merr këtë post.
Ai ka sulmuar Kreun e Shtetit, Ilir Meta, i cili pak ditë më parë dekretoi 6 marsin si ditën e zgjedhjeve të pjesshme në 6 Bashki. Sipas kreut të qeverisë, Meta për një kohë të gjatë ka shkelur Kushtetutën, ndërsa mban peng institucionin.
“Na duhet të zgjedhim presidentin, dhe do ta zgjedhë ky grup parlamentar, në radhë të parë. Komplikimi i skajshëm me krijimin e dy PD-ve, na e bën të vështirë të gjejmë adresën se ku ta kërkojmë dialogun, me opozitën parlamentare, por ndërkohë ne duhet të mendojmë për mënyrën se si mund të këshillohemi me qytetarët edhe për këtë vendimmarrje.
Në një mënyrë apo në një tjetër, duhet të gjejmë mënyrën për mbledhur opinionin e njerëzve lidhur me figurën e Presidentit të Republikës. Pas një serie personazhesh që e kanë degraduar figurën e presidentit, ne kemi përgjegjësinë e madhe qytetare, politike e kushtetuese, që t’i japim popullit shqiptar në krye të shtetit një njeri normal.
Një kryetar shteti që t’i kthejë normalitetin njerëzor, moral e institucional zyrës së presidentit. Nuk do të bjerë nga qielli, me siguri do të gjendet mes nesh, këtu në territorin e Republikës së Shqipërisë, apo në territorin shpirtëror të kombit tonë. Se mund të jetë dhe jashtë kufijve, por e kemi detyrim t’i japim asaj zyre që për pesë vitet e ardhshme të ketë një njeri normal, një qytetar normal, një figurë moralisht dhe profesionalisht normale.
Prandaj, do ju lutesha të gjithëve të mendojmë në këtë sens dhe cilido që ka një ide lidhur me se si mund të organizohemi në këtë drejtim, t’i ndajë me drejtuesit e grupit. Mund të organizojmë në vijim edhe një bashkëbisedim, se si mund të përfshijmë edhe qytetarët për këtë”, u shpreh Rama.
