Rama pezullon ligjin “7501” vetëm për pronat në bregdet, 12 bashki në ‘hall’

Kryeministri Edi Rama dje nga Elbasani njoftoi se qeveria do të pezullojë përkohësisht ligjin “7501”. Ky dendim i qeverisë u kundërshtua fort nga deputet dhe ish-ministra të opozitës duke e quajtur atë antikushtetues.

Ndërkohë sonte është zbardhur vendimi i Këshillit të Ministrave i cili thotë të pezullojë procedurën e kalimit në pronësi të tokës bujqësore të ish-ndërmarrjeve, të ndara me ligjin 7501, në 12 bashki të vendit.

E thënë më thjeshtë Qeveria do të bllokojë procesin e dhënies së tokave bujqësore për fermerët që i kanë ato në përdorim dhe kjo do të zbatohet kryesisht në zonat me përparësi zhvillimin turistik.

Nga ky vendim i qeverisë ato që do të prekën më shumtë, janë pronat të cilat ndodhen në zonat bregdetare dhe me përparësi zhvillimin turistik.

Këshillit të Ministrave ka vendosur që këto prona do të grupohen në një regjistër të posaçëm dhe do të shpronësohen me qëllim ofrimin e tyre ndaj investitorëve strategjikë. Nga vendimi do të preken qytetarët që presin të përfundojnë brenda vitit, plotësimin me tapi për pronat e ish-ndërmarrjeve bujqësore, ligj që është në fuqi deri në 31 dhjetor të vitit 2018.

Nga VKM-ja e publikuar sot, ky vendimi i pezullimit të procesit të ndarjes së tokave të ish-NB-ve do të zbatohet në Bashkinë Shkodër, Lezhë, Kurbin, Durrës, Kavajë, Rrogozhinë, Divjakë, Fier, Vlorë, Himarë, Sarandë dhe Konispol.

“Pezullimin e përkohshëm të vijimit të procedurave të kalimit në pronësi të përfituesve të tokës bujqësore të ish-ndërmarrjeve bujqësore dhe të regjistrimit të akteve të marrjes së tokës në pronësi, në zonën me rëndësi për fondin e mbështetjes së investimeve strategjike, sipas hartës bashkëlidhur këtij vendimi, publikuar edhe në Gjeoportalin Kombëtar, të administruar nga Autoriteti Shtetëror për Informacionin Gjeohapësinor (ASIG), deri në krijimin e Fondit të Pasurive të Paluajtshme për Mbështetjen e Investimeve Strategjike, sipas nenit 31, të ligjit nr.55/2015, “Për investimet strategjike në Republikën e Shqipërisë”, thekson pika e parë e vendimit të qeverisë.

Me këtë vendim, urdhërohen katër ministri që të marrin masa për të pezulluar procesin. “Ngarkohen Ministria e Bujqësisë dhe Zhvillimit Rural, Ministria e Financave dhe Ekonomisë, Ministria e Drejtësisë, Ministria e Turizmit dhe Mjedisit, Zyra Qendrore e Regjistrimit të Pasurive të Paluajtshme, zyrat vendore të regjistrimit të pasurive të paluajtshme dhe bashkitë Shkodër, Lezhë, Kurbin, Durrës, Kavajë, Rrogozhinë, Divjakë, Fier, Vlorë, Himarë, Sarandë dhe Konispol për zbatimin e këtij vendimi”, thekson VKM e qeverisë.

Disa javë më parë, Qeveria miratoi një tjetër vendim që shkon në favor të investitorëve strategjikë, kryesisht në zonat bregdetare. Qeveria miratoi një Task-Forcë, e cila do të evidentojë të gjitha pronat shtetërore, të cilat ndahen deri në 1.5 kilometra nga vija bregdetare dhe këto prona do të përdoren për të afruar investitorë strategjikë.VKM për pronat

VENDIM PËR PEZULLIMIN E PËRKOHSHËM TË PROCEDURAVE TË KALIMIT NË PRONËSI TË PËRFITUESVE TË TOKËS BUJQËSORE TË ISHNDËRMARRJEVE BUJQËSORE DHE TË REGJISTRIMIT TË AKTEVE TË MARRJES SË TOKËS NË PRONËSI, NË ZONËN ME RËNDËSI PËR FONDIN E MBËSHTETJES SË INVESTIMEVE STRATEGJIKE

Në mbështetje të nenit 100 të Kushtetutës, të nenit 7, të ligjit nr.171/2014, “Për përfundimin e procedurave ligjore të kalimit të tokës bujqësore të ish-ndërmarrjeve bujqësore në pronësi të përfituesve”, të ndryshuar, të nenit 9, të ligjit nr.9948, datë 7.7.2008, “Për shqyrtimin e vlefshmërisë ligjore të krijimit të titujve të pronësisë mbi tokën bujqësore”, të ndryshuar, të neneve 25 e 45, të ligjit nr.33/2012, “Për regjistrimin e pasurive të paluajtshme”, të ndryshuar dhe të neneve 27 e 31, të ligjit nr.55/2015, “Për investimet strategjike në Republikën e Shqipërisë”, me propozimin e ministrit të Bujqësisë dhe Zhvillimit Rural, të ministrit të Financave dhe Ekonomisë, ministrit të Drejtësisë dhe të ministrit të Turizmit dhe Mjedisit, Këshilli i Ministrave

VENDOSI:

1. Pezullimin e përkohshëm të vijimit të procedurave të kalimit në pronësi të përfituesve të tokës bujqësore të ish-ndërmarrjeve bujqësore dhe të regjistrimit të akteve të marrjes së tokës në pronësi, në zonën me rëndësi për fondin e mbështetjes së investimeve strategjike, sipas hartës bashkëlidhur këtij vendimi, publikuar edhe në Gjeoportalin Kombëtar, të administruar nga Autoriteti Shtetëror për Informacionin Gjeohapësinor (ASIG), deri në krijimin e Fondit të Pasurive të Paluajtshme për Mbështetjen e Investimeve Strategjike, sipas nenit 31, të ligjit nr.55/2015, “Për investimet strategjike në Republikën e Shqipërisë”.
2. Njësitë e vetëqeverisjes vendore, zyrat vendore të regjistrimit të pasurive të paluajtshme, territori administrativ i të cilave përfshihet në hartën e përmendur në pikën 1 të këtij vendimi, të pezullojnë procedurat e kalimit në pronësi të tokës së ish-ndërrmarrjeve bujqësore dhe të regjistrimit të akteve të marrjes së tokës, në zonën me rëndësi për fondin e mbështetjes së investimeve strategjike, pavarësisht nga faza procedurale, menjëherë me hyrjen në fuqi të këtij vendimi.
3. Ngarkohen Ministria e Bujqësisë dhe Zhvillimit Rural, Ministria e Financave dhe Ekonomisë, Ministria e Drejtësisë, Ministria e Turizmit dhe Mjedisit, Zyra Qendrore e Regjistrimit të Pasurive të Paluajtshme, zyrat vendore të regjistrimit të pasurive të paluajtshme dhe bashkitë Shkodër, Lezhë, Kurbin, Durrës, Kavajë, Rrogozhinë, Divjakë, Fier, Vlorë, Himarë, Sarandë dhe Konispol për zbatimin e këtij vendimi.