Kryeministri Edi Rama i ka bërë sërish thirrje SPAK-ut që të hetojë për Sali Berishën, por jo ta dënojë. Në një konferencë për shtyp nga selia e PS-së së bashku me Ministrin e Drejtësisë, Ulsi Manja, Rama u shpreh se dënimin nuk e vendosin ata. Kryeministri Edi Rama nuk e quan presion thirrjen e tij ndaj SPAK-ut për të hetuar ish-kryeministrin Sali Berisha. Gjatë konferencës për shtyp, Rama theksoi se ka kërkuar hetim për ish-kryeministrin Berisha pas shpalljes së tij “non grata” nga DASH dhe akuzave të cilat i quan më të rëndat ndaj një ish-kryeministri.
“Presion mbi drejtësinë? Çfarë duhet të thonim për deklaratat e BE-së dhe SHBA-së ku është kërkuar ndëshkimi i politikanëve apo gjykatësve të korruptuar? Sipas meje jo, nuk ka presion mbi drejtësinë.
Çfarë presioni është të kërkosh hetimin e një ish-presidenti dhe një ish-kryeministri të shpallur “non grata” nga SHBA-ja me akuzat më të rënda të mundshme, që lidhen me veprimtarinë e institucioneve të këtij vendi?
Sekretari Amerikan i Shtetit ka kërkuar publikisht se institucionet e këtij vendi duhet të bëjnë punën e tyre. Që të jemi të qartë, juve mund të provoni të kundërtën. Unë nuk kam kërkuar dënim, por hetim. Dënimin nuk e vendosim ne, por të hetohet një çështje që është gur në qafë për të gjithë Shqipërinë dhe nuk është çështje e një personi, është domosdoshmëri.
Të zbardhet e vërteta nga një drejtësi e drejtë dhe e pavarur. Që janë të pavarur nuk ka pikë diskutimi, prandaj duhet të çlirohet nga çdo frikë e të kaluarës dhe më në fund të hetohen 21 Janari, krimi shtetëror nuk ekziston. Të hetohet nëse është apo nuk është. Këtë ta tregojë hetimi i drejtë dhe i pavarur. Të hetohet Gërdeci. Janë dhjetëra të vrarë e qindra të plagosur.
Të hetohen disa skandale të mëdha financiare e korruptive. Çfarë presioni e ngutje është kjo? Nuk është ngutje se jemi në fund të vitit të tretë dhe nuk kemi folur. Të gjithë baltën për këtë ngurrim të pajustifikueshëm e kam mbajtur unë personalisht”, tha Rama.
