Kryeministri Edi Rama ka ritheksuar se nuk do të tërhiqet nga ndalimi i koalicioneve në Kushtetutë.
Në një prononcim për mediat, Rama u shpreh se ndalimi i koalicioneve do të formulohet në ligjin zgjedhor. Sipas kreut të qeverisë, fjalia në Kushtetutë që thotë “ndalim i koalicioneve parazgjedhore” nuk do të thotë që ato hiqen. Ai shton se nisma është modifikuar në proces dhe është siguruar ndër të tjera heqja e pragut 5%.
“E kam thënë, nisma është modifikuar në proces. Nisma e deputetëve të opozitës parlamentare që kërkonin listat e hapura, ndalimin e koalicioneve, pragun. Kemi kërkuar fleksibilitet. Heqja e asaj pjese në Kushtetutë, ku përcaktohet si rregullore formula e koalicioneve nuk do të thotë heqja e koalicioneve. Do të formulohen në ligjin zgjedhor. Edhe pragu 5% është hequr. Kemi dhe hapjen e listave. Jemi afruar por nuk ka shumë kohë. Përfitoj nga rasti që nga Këshilli Politik, që toni ishte pozitiv”, tha ai.
