Ish-Presidenti Bamir Topi fajëson politikën për situatën e rënduar që është krijuar në vend.
I ftuar në emisionin “Kjo Javë’ në News24, Topi komentoi edhe kërkesën e vazhdueshme të opozitës për zgjedhje të parakohshme. Ish-presidenti hodhi dyshime nëse vetë opozita do ishte e gatshme për zhvillimin e zgjedhjeve. Sipas tij, të dyja partitë e mëdha politike, PS dhe PD, janë fajtore për krizën politike në vend.
“Politika është përgjegjëse padyshim! Dhe politika nuk janë njerëzit, janë institucionet, ku të parat përgjegjëse janë partitë kryesore, PS e para, PD e dyta. PD, sepse gjithmonë instrumenti i kontrollit në mazhorancë është opozita. Rama është inekzistent në këtë periudhë.
“Situata është e rëndë”, Bamir Topi tregon detaje nga biseda me Metën
Fakti që palët nuk janë në fushën e lojës, dikush ka zaptuar fushën, pasi parlamenti sot dominohet nga mazhoranca. A është opozita gati për zgjedhje të parakohshme? Çdo pyetje e bërë pas, e nxjerr të pasinqertë pyetjen që është bërë para. Raporti mes opozitës dhe qeverisë më duket një marrëdhënie në ajër, pasi kryeministri nuk ngopet, sepse kjo lloj sjellje e opozitës ka bërë që faktorët ndërkombëtarë, që nuk pranojë kurrsesi braktisjen e institucioneve, të mos e konsiderojnë më dhe i japin suport kryeministrit aktual.
Në një vend tjetër nuk do të kishte shans që një kryeministër të mos ngopet. Këtu është cenuar në themel historia e demokracisë, asgjë nuk shkon mirë. Le të dalin njerëzit në protestë, se do jem një nga ato zëra që do i mbështes fort, por asnjë nuk del. Duhet të dalin njerëzit dhe opozita. Rasti i studentëve ishte për t’u marrë shembull, të gjithë politikanët e patën frikë”, deklaroi ai.
