Ka nisur në Bruksel takimi joformal i Presidentit të Këshillit Europian, Charles Michel me krerët e vendeve të Ballkanit Perëndimor, ku merr pjesë dhe kryeministri Rama. Në nisje të takimit, Michel ka dhënë një deklaratë për mediat, ku ka theksuar se “duam të japim sinjale të qarta lidhur me progresin që duhet bërë për reformat e shtetit ligjor, luftën kundër korrupsionit dhe krimit te organizuar në shtetet e Ballkanit”.
Deklarata e Presidentit të Këshillit Europian, Charles Michel në fillim të samitit jozyrtar me liderët e Ballkanit:
“Takimi i sotëm është një takim me liderët e Ballkanit Perëndimor, për të përgatitur samitin e Zagrebit në maj, për të parë se si mund të thellojmë partneritetin me këto vende. Të konfirmojmë një perspektivë europiane dhe të japim sinjale të qarta lidhur me progresin që duhet bërë për reformat e shtetit ligjor, luftën kundër korrupsionit dhe krimit të organizuar.
Shpresojmë që do kemi një takim të sinqertë, intensiv dhe të hapur për të parë se në ç’mënyrë konkrete dhe preçize mund të zhvillojmë partneritetin me këto vende”.
Nesër, kryeministri Rama do të marrë pjesë në Konferencën e Donatorëve, ku shpresohet për një fond të madh të akorduar për Shqipërinë, për rindërtimin nga tërmeti që goditi vendin tonë në 26 nëntor.
