Kryeministri Rama ka konfirmuar sot në Kongresin e PS-së, për ndërhyrjen në çmimin e energjisë elektrike për një fashë të konsumatorëve. Rama tha se 5% e konsumatorëve harxhojnë 25% të energjisë elektrike për abontët familjarë. E për rrjedhojë, ata që harxhojnë shumë, duhet që të paguajnë më shumë. Në fjalën e tij në Kongresin e PS, Rama tha se “5% e konsumatorëve që konsumojnë 25% të energjisë, nuk mund e nuk do vazhdojnë t’i mbajmë me të njëjtën përkujdesje siç bëjmë për pensionistët”.
“Askush nuk e di sa kohë akoma duhet të përballemi më këtë çmenduri në çmimin e energjisë elektrike.
Ndaj dhe së paku jo se do na zgjidhë problemin, por kemi nevojë më shumë se asnjë herë sot, sensit të shpërndarjes së barrës dhe marrjes përsipër të peshave nga kjo peshë sipas mundësive. Ne së shpejti do vendosim një çmim tjetër për të gjithë ata që konsumojnë energji elektrike shumë më tepër se masa e gjerë e popullit, se janë më të pasur.
Nuk ka asgjë më normale e të natyrshme sa të shkojmë kundër rrymës të vetë sistemit për të mos lejuar që pensionistët tanë të kenë një dhimbje koke te shtuar, për shkak të faturës së energjisë. 5% e konsumatorëve që konsumojnë 25% të energjisë, nuk mund e nuk do vazhdojnë ti mbajmë me të njëjtën përkujdesje siç bëjmë për pensionistët”.
