Kryeministri Rama, së bashku me Ministren e Shëndetësisë, Ogerta Manastirliu kanë inspektuar pediatrinë e re të spitalit të Elbasanit. Që në nisje të takimit me bluzat e bardha të këtij spitali, Rama i kujtoi se në qershor do të rritet rroga.
“Erdhi qershori tani, ju rrisim rrogën”, tha Rama, ndërsa mjekët qeshin.
Ministrja Manastirliu tha se tashmë korpusi Spitalit të Elbasanit është tërësisht i kompletuar për nga pikëpamja e strukturës spitalore, por edha nga pikëpamja e teknologjisë, imazherisë dhe laboratorëve.
“Pas një seri investimesh në spitalin e Elbasanit, investimi më i ri tashmë i përfunduar është Spitali Pediatrik. Një angazhim i përmbushur tashmë që i siguron shërbime cilësore më shumë se 20 mijë fëmijëve, që marrin shërbim cdo vit në këtë spital.
Se si kanë qenë kushtet e Spitalit Pediatrik, atë e dinë fare mirë të gjithë mjekët dhe infermierët e këtij spitali, por për të thënë të vërtetën, tashmë korpusi i spitalit të Elbasanit është një korpus i mirëinvestuar nga pikëpamja e infrastrukturës spitalore. Por edhe nga pikëpamja e teknologjisë, imazherisë dhe laboratorit që tashmë janë përfshirë në gjithë programin e zhvillimit spitalor”, u shpreh ministrja Manastirliu.
