Kreu i Partisë Demokratike, Lulzim Basha në fjalimin e tij para protestuesve në bulevardin “Dëshmorët e Kombit” u shpreh se mesazhi për Edi Ramën është një dhe i prerë: nuk do të mundet më të bllokojë rrugën Europiane të Shqipërisë.
“Jemi mbledhur në referendumin më të madh, nga Shkodra në Vlorë, nga Tropoja në Gjirokastër, ju uroj nga zemra mirë se keni ardhur në Kuvendin e sovranit. Jemi mbledhur sot këtu me një mision, për të çliruar Shqipërinë e krimit të korrupsionit, për Shqipërinë si gjithë Europa.
Jemi mbledhur sot këtu me një kushtrim me një qëllim, me një mision për të mos pranuar më kurrë Shqipërinë e krimit, të korrupsionit, hajdutërisë, por për Shqipërinë si gjithë Europa. Shqipëri si gjithë Europa ka 30 vite që shqiptarët bëjnë sakrifica të përditshme.
Jemi sot në një udhëkryq të tmerrshëm produkt i një njeriu dhe klanit të tij të babëzitur, ndaj jemi këtu për ti dhënë një mesazh të prerë: Nuk të lëmë më të bllokosh rrugën drejt Europës. Rama ik! 6 vite e gjysmë të sundimit kriminal të Ramës e kanë lënë Shqipërinë jashtë europës, vendi i vetëm në botë pa gjykatë kushtetuese. Sot drejtësia shqiptare është më e kapur se kurrë, kjo është vepra e zezë e Edi Ramës dhe bandës së tij kriminale. Rama ik.
Sundimi i Edi Ramës, pa gjykatë Kushtetuese dhe të Lartë, ku është kapur edhe prokuroria, sot drejtësia shqiptare është më e kapur dhe më e korruptuar se kurrë më parë. Por besimi ynë europian nuk mund të mbetet më në dyert e një klike kriminale, në duart e njeriut më të korruptuar që ka njohur Shqipëria dhe Ballkani.
Të çlirojmë Shqipërinë nga krimi. Ky është parakushti për të hapur rrugën drejt Evropës. Me këtë ëndërr kemi qëndruar në ditët më të zeza të diktaturës dhe tiranisë së krimit, kemi kërkuar hetimin e atyre që vodhën zgjedhjet e 2017. Bashkimi i Ramës me krimin, ka një përgjigje: t’i dhunojë shqiptarët, t’i dhunojë zgjedhjet e ardhshme.
Kasapi i zgjedhjeve s’do mundet më të fitojë, zgjedhje me krimin nuk do të ketë më, armata e lirisë është ngritur në këmbë.” “ u shpreh Basha
