Kryeministri Edi Rama në takimin e tij me importuesit, eksportuesit dhe përfaqësuesit e zinxhirit me mallrat e shportës dha lajmin e mirë të garancisë sovrane. Rama ka folur për garancinë sovrane të ofruar në këtë situatë krize, pasi lufta ka impaktuar të gjitha marrëdhëniet tregtare. Kjo do të thotë që në këtë krizë, çdo furnizues do të mund të blejë mallra për t’i mbajtur rezervë, dhe nëse ato nuk shiten, do të jetë shteti ai që do t’i mbajë ato.
Kreu i qeverisë u ka kërkuar atyre që të marrin sa më shumë produkte, për t’i pasur si rezerva ushqimore, në rast të çdo situate që mund të shkaktohet nga lufta në Ukrainë. Kryeministri i garantoi ata se në rast se këto produkte u ngelen dhe nuk shiten, do t’i blejë shteti dhe për këtë arsye është vendosur garanci sovrane.
“Ju falenderoj, sepse jemi realisht mirënjohës për ndjeshmërinë dhe gatishmërinë e shprehur jo me fjalë, por me fakte. Që të bëheni pjesë e kësaj përpjekje të përbashkët, në këtë hall të madh që ka zënë të gjitha vendet si rezultat i një kombinimi realisht shumë unik. Nga kriza energjetike tek kriza e zinxhirit të furnizimit, për shkak të luftës në Ukrainë në radhë të parë që ka impaktuar të gjitha marrëdhëniet tregtare. Natyrisht që jemi të vetëdijshëm që kjo përpjekje dhe krijimi i dy bordeve që kemi ngritur për të adresuar këtë problem, është një përpjekje anti-sistem, pasi nuk është e natyrshme, as e këshillueshme, ndërkohë që kemi zgjedhur tregun e lire. Shteti të ndërhyjë për të vendosur tavane e kështu me radhë. Për ketë arsye e kemi bërë këtë gjë, në mënyrë të sjellshme ndaj sistemit, duke përfshirë edhe ju. Ndërkohë, ne e mirëkuptojmë shumë situatën tuaj edhe të pasigurisë në financim, por edhe të përgjithshmen. Ne kemi vendosur garancinë sovrane, që ju të mund të merrni dhe ta përdorni me garanci të plotë të shtetit, çdo kredi për të marrë edhe më shumë furnizim se zakonisht, për ta pasur më afatgjatë me mirëkuptimin e shkruar që çdo gjë që do të mbetet do ta marri shteti. Nuk do t’iu mbetet e pa shitur, s’do të humbisni paratë nga një investim me përgjegjshmëri sociale dhe jo thjesht biznesi për të qenë aty. Kjo garanci sovrane është që të gjitha ata që janë të përfshirë në zinxhirin e furnizimit, të kenë mundësi të investojnë dhe shpenzojnë siç duhet. Kjo është rezervë dhe shtetërore në të njëjtën kohë. Ju do ta përdorni siç përdorni zakonisht rezervat, por nëse mbetet, do ta marrë shteti”, tha ai.
