Kryeministri Edi Rama zhvilloi ditën e sotme një bashkëbisedim me gazetarët, teksa mes pyetjeve të drejtuara, ai u ndesh në një situatë që e detyroi atë të kthehej pas në kohë.
Gjatë konferencës së mbajtur, u pyet se çfarë do të mendonte Rama i atyre viteve për ato që do të ndodhnin më pas, si pakti me Berishën në 2008, marrëveshja me Bashën në 2017, tërheqja nga greva e urisë, apo dosjet e nxehta 339 dhe 184.
Rama tha se po e pyeste për “Ramën me flokë” dhe se nuk e kishte menduar ndonjëherë një gjë të tillë, ndërsa premtoi se do të kthente një përgjigje në fund të konferencës.
Ai nënvizoi se “Rama me flokë” do ta kundërshtonte për shumë gjëra, pasi nuk do ta kuptonte.
“Në atë kohë nuk kishte hyrë në asnjë zyrë shteti përveç se në Institutin e Arteve dhe në Galerinë Kombëtare. Ai Rama me flokë hyri në një zyrë shteti si ministër Kulture dhe nuk merrte vesh nga jeta që zhvillohej në anën tjetër të barrikadës. Në shumë gjëra do më kundërshtonte se s’do më kuptonte”, deklaroi kryeministri.
