Kryedemokrati Basha ka nisur mobilizimin e strukturave organizative në Tiranë, lidhur me ‘valën’ e paralajmëruar të protestave para godinës së Kuvendit. Sikundër njoftuan burimet zyrtare për media, pasditen e sotme është parashikuar që kreu i PD-së të zhvillojë një takim me krerët e degëve të Tiranës. Në mbledhje pritet të diskutohet për sezonin e protestave të planifikuara nga PD, që pas vendimit për djegien e mandateve nga opozita e bashkuar.
Protesta e radhës pritet të zhvillohet këtë të enjte, në orën 10:00, paralel me nisjen e punimeve të seancës plenare. Opozita ka vendosur të protestojë çdo të enjte para Parlamentit, për të kulmuar me një protestë masive dhe kombëtare në datën 16 mars në Bulevardin Dëshmorët e Kombit para Kryeministrisë.
Po sot, kryeministri dhe njëherazi kryetari i PS, Edi Rama, mblodhi Kryesinë në ambientet e selisë rozë. Gjatë mbledhjes është diskutuar gjerësisht situata politike në vend. Diskutimet në mbledhje ka qenë të orientuara më tepër në drejtim të përgjegjësive të mazhorancës në qeverisjen e vendit, dhe punën që duhet bërë deri në qershor kur pritet të vendosë BE për çeljen e negociatave.
Një ditë më parë, kryeministri Edi Rama porositi deputetët dhe ministrat që të refuzojnë daljen në çdo studio mediatike me përfaqësuesit e opozitës. Sipas tij, pas dorëzimit të mandateve, ish-deputetët e PD dhe LSI nuk janë më përfaqësues të opozitës.
