Shqipëria ka arritur në shifrën e mbi 1 milionë vaksinimeve kundër koronavirusit deri më tani. Lajmi është bërë i ditur nga kryeministri Edi Rama, përmes një postimi në rrjetet sociale.
Objektivi i shpallr nga qeveria, ishte kryerja e 1 milionë vaksinimeve në muajin qershor, mirëpo ky objektiv u arrit sot, më 6 korrik.
Aktualisht në vend, po përdoren katër lloje vaksinash, ku mund të përmendim Pfizer, AstraZeneca, Sinovac dhe Spuntnik V.
”Ia kemi dalë të kryejmë mbi 1 MILION vaksinime dhe nuk do të ndalemi derisa qytetari i fundit të vaksinohet. ShqipëriaBuzëqesh”, shkruan Rama në rrjetin social, Facebook.
Situata epidemiologjike
Në 24 orët e fundit janë kryer 2,907 testime, nga të cilat ka rezultuar pozitiv me Covid19 shtatë qytetarë në këto bashki: 3 raste në Devoll, 2 raste në Tiranë, 1 rast në Shkodër, 1 rast në Mirditë.
Aktualisht janë 55 pacientë aktivë me COVID19 në të gjithë vendin. Në Spitalin Infektiv po marrin trajtim spitalor të specializuar 3 pacientë. Në 24 orët e fundit nuk ka asnjë humbje jete me Sars-Cov2 pozitiv.
Janë shëruar 4 qytetarë gjatë 24 orëve të fundit, duke e çuar numrin e të shëruarve në 130,033 që nga fillimi i epidemisë.
