Kreu i qeverisë Edi Rama, ka komentuar gjatë një konference për shtyp protestën e opozitës më 12 nëntor. Ai tha se protesta e së shtunës nuk ishte e qytetarëve të shqetësuar, por e partive dhe militantëve të tyre për pushtet. Sipas tij, ajo gatuhet nga i njëjti kuzhinier prej 30 vitesh, “non grata”. Ndër të tjera, kryeministri Rama theksoi se nuk është aspak i shqetësuar nga protesta, dhe tha se opozita mund t’i bëjë sa herë të dojë.
“Sa i përket protestës, çfarë proteste më flisni? Për cilët qytetarë më flisni? Për një protestë partish? Një “non gratë” dhe një spiun që mbledhin militantët e tyre?
Mund ta bëjnë sa herë të duan, kjo nuk ka lidhje me popullin. Nuk ka lidhje me qytetarët e shqetësuar. Kjo është një protestë partish për pushtet. Për të prishur e për të marrë.
Me të vetmin rezultat që hodhën ca bojë këtu që u deshën të punonin punëtorët natën për ta larë. Kaq. Se kështu është ndarë kjo punë! Ata bëjnë pis, e ne pastro. Çfarë proteste? As nuk di sa ishin, as nuk kam parë dhe as nuk më intereson.
Mund ta bëjnë çdo ditë po të duan, është një çorbë që e kemi parë prej 30 vjetësh, që e gatuan i njëjti kuzhinier, “non grata”. Mua më vjen keq për ata që pavarësisht se janë militantë, harrojnë që po shkojnë pas disave që paguhen nga të huajt për të bërë dëm në këtë vend. Ky është fakt”, u shpreh Rama.
