Kryeministri Edi Rama i është përgjigjur akuzave të opozitës pas vendimit të Kuvendit për mosarrestimin e ish-ministrit të Brendshëm, Saimir Tahiri. Duke replikuar me kreun e Partisë Demokratike Lulzim Basha, kryeministri ka filluar t’i këndojë me vargjet e këngës: “O Selman i vëllait kë të qaj më parë, ty apo motrën tonë që iu zu i njëjti hall. As kë kam kë qaj dhe as kam si ju qaj për hir të së vërtetës, përveçse duke thënë këtu në sy diçka që ua kam thënë edhe më parë dhe vlen të përsëritet dhe për ata që na dëgjojnë. Kush i bën shqiptarët për budallenj në fund e ha”, u shpreh me ironi kryeministri Rama.
Kryeministri vuri në dukje se opozita ka gabuar rëndë duke i konsideruar shqiptarët të paaftë për të kuptuar se nga qëndron e drejta dhe e vërteta. Dhe duke i konsideruar të tillë, sipas tij, opozita e ka pësuar gjithmonë. Ndërsa i kërkoi opozitës që të ndalë urrejtjen kundrejt mazhorancës.
“Nëse i bën shqiptarët për budalla gabon rëndë dhe do ta paguani. Dhe keq e më keq do ta paguani. Kjo është fatura që keni marrë nga shqiptarët, herë pas here që i keni bërë për budallenj. Çirruni por nuk mund ta bëni për budalla këtë popull. Nuk mund të mos më dhimbset urrejtja që po i fundos çdo ditë në llumin e atyre lopatave si institucion i i opozitës. Urrejtja që i ka kthyer në vegla qorre. E vetmja këshillë që mund të jepja; ja ikën, nuk dëgjojnë dhe kujtojnë se mund ta marrin për budalla këtë popull, është që të mos na vazhdojnë të na urrejnë, sepse aq shumë sa do të na urrejnë aq më shumë do të humbasin ndërgjegjen”, përfundoi Rama.
https://www.facebook.com/edirama.al/videos/10155253348631523/
