Kryeministri Edi Rama është shprehur kritik ndaj Bashkimit Europian në lidhje me integrimin e Ballkanit Perëndimor, teksa e konsideroi këtë proces si të njëjtë me pushtimin e Trojës.
Pavarësisht “jo”-së së radhës për mbajtjen e Konferencës së Parë Ndërqeveritare, Rama tha marrëdhëniet e Ballkanit Perëndimor me Bashkimin Europian nuk kanë ndryshuar, shkruan Banking News.
“U deshën disa vite për të pushtuar Trojën. Në të njëjtën mënyrë po përparon edhe përvoja e vendeve të Ballkanit në radhët e BE”, tha Rama. Kreu i qeverisë përsëriti edhe njëherë shprehen se Shqipëria dhe Maqedonia e Veriut “po presin për Godonë”, duke iu referuar librit të Samuel Beckett.
Megjithëse është treguar kritik, Rama deklaroi se qeveria e tij do të bëjë të gjitha përpjekjet e mundshme që Shqipëria të integrohet në Bashkimin Europian.
“Vendet e Ballkanit kanë vite që janë në proces integrimi dhe do të bëjnë gjithçka për të qenë anëtare të BE. Nuk kemi alternativë tjetër dhe nuk duam të kërkojmë për alternativë tjetër. Por është shumë e lodhshme të qëndrosh në dhomën e pritjes. Sot ne jemi peng i nacionalizmit evropian. Dhe është e trishtueshme”, tha Rama.
