Pas Ministrisë së Brendshme, protesta për të riun Klodian Rasha, u zhvendos para kryeministrisë.
Protestuesit u ndanë në dy grupe, një pjesë te Ministria dhe të tjerët para godinës së qeverisë në portën hyrëse të saj, ku është vendosur edhe një kordon policie.
Ata kanë hedhur sende të forta në drejtim të godinës, ndërsa bëjnë thirrje “Duam drejtësi, Rama ik!”. Të shumta kanë qenë reagimet ndaj kësaj ngjarjeje të rëndë, teksa kërkohet dorëheqja e Ministrit të Brendshëm, Sandër Lleshaj.
Klodian Rasha, 25-vjeç është ekzekutuar me dy plumba këtë të martë, 8 dhjetor, nga një efektiv policie. Ngjarja ka ndodhur në Laprakë të kryeqytetit, pasi i riu kishte dalë orët e para të mëngjesit jashtë banesës së tij.
Policia shprehet se i riu ka kërcënuar efektivin e policisë, ndaj ai ka qëlluar në kushtet e vetëmbrojtjes dhe në errësirë. Por ndryshe thonë familjarët dhe fqinjët të cilët shprehen se rruga është me ndriçim dhe i riu nuk mbante asnjëherë armë me vete.
