Kryesore

“Rama ik”, Patozi flet për platformën e re dhe thumbon hapur opozitën


               Publikuar në : 16:47 - 19/11/19 M S

Kreu i partisë “Bindja Demokratike”, Astrit Patozi, ka deklaruar se opozita përtej deklaratave “Rama ik”, nuk po bëjnë asgjë konkrete për ta larguar kryeministrin nga drejtimi i vendit.

Në komentin e radhës në Facebook, ai njofton qytetarët se “Bindja Demokratike”, ka shpallur prej gati një muaji një platformë serioze, për reformimin e plotë të sistemit tonë politik.

Patozi argumenton se në epiqendër të kësaj platforme është kufizimi drastik i pushtetit të kryeministrit. Sipas kësaj force politike, kjo mbetet rruga vendimtare për të shpëtuar shoqërinë, nga shijet banale të udhëheqësve.

“Rama ik”/ Basha komenton thirrjet e tifozëve

Statusi

PËR ATA QË E DUAN EDI RAMËN TË DOBËT, JO VETËM NË STADIUM

Në këtë vend nuk mund të thuash asnjëherë që e keqja ka prekur fundin, ndaj edhe asgjë nuk mund të parashikohet me siguri. Me sa duket, dikujt i ka lindur në kokë marrëzia e radhës për të shpëtuar prej Ilir Metës, duke ndryshuar kushtetutën.

Në fakt, Shqipëria ka realisht një nevojë ulëritëse për ta prekur kushtetutën, por jo duke kufizuar Presidentin e Republikës. Sepse ne hallin më të madh e kemi me kryeministrin, të cilit duhet t’ia hollojmë sa të mundemi pushtetin dhe t’ia zvogëlojmë kompentencat.
Është e vetmja mënyrë për të reduktuar dëmin që mund të sjellë ai, fillimisht duke deformuar zgjedhjet, e më pas duke sunduar me arrogancë, në vend që të qeverisë normalisht.

Por çudia qëndron se ata, që ngazëllehen me të drejtë në stadium nga thirrjet “Rama ik”, nuk thonë asnjë fjalë për këtë çështje. Ndërkohë BINDJA DEMOKRATIKE ka shpallur prej gati një muaji një platformë serioze për reformimin e plotë të sistemit tonë politik, në epiqendër të së cilës është kufizimi drastik i pushtetit të kryeministrit.

Sipas nesh, kjo është e vetmja rrugë për të shpëtuar shoqërinë nga humori dhe shijet banale të udhëheqësve, që shndërrohen gradualisht në përbindësha politikë, duke keqpërdorur privilegjet që i garanton sistemi ynë i dështuar.

Kthehu
WhatsApp Denonco ne TT