Ministrja e re e Bujqësisë, Milva Ekonomi, e ka cilësuar si një përgjegjësi të madhe besimin e postit të ri nga ana e kryeministrit Rama. Në një prononcim për mediat, Ekonomi tha para gazetarëve se është përgjegjësi e madhe, e se i duhet më shumë siguri dhe mbështetje nga ana e tyre.
“Natyrisht që është përgjegjësi e madhe, besoj që më duhet bashkëpunim, më duhet të kuptoj, më shumë siguri dhe mbështetje dhe nga ana juaj.
Në atë Ministri kemi pasur një bashkëpunim shumë të mirë me BE-në. Ne sapo kemi filluar një mbështetje për fermerët, për uljen e të gjitha barrierave fiskale, më shumë besim, më shumë përkrahje, dhe më shumë eksporte”, u shpreh Ekonomi para nisjes së seancës në Kuvend.
Kryeministri Edi Rama ka zyrtarizuar dje vendimin për pasardhësin e Sandër Lleshajt duke e zhvendosur Çuçin nga ministria e Bujqësisë tek ajo e Rendit. Ndërkohë në vend të tij si ministre Bujqësie kryeministri Edi Rama ka propozuar Milva Ekonomin.
Çuçi është ministër aktualisht dhe Ekonomi ka qenë ministre Ekonomie para se të vinte Balluku. Me anë të një postimi në Twitter, kryeministri Rama njoftoi se do të kërkojë firmën e presidentit Ilir Meta për emërimin e Blendi Çuçit në krye të këtij dikasteri, si edhe për Milva Ekonomin.
Rama u shpreh se dy emrat e propozuar kanë punuar me përkushtim në postet që kanë pasur gjatë këtyre viteve.
