Kryeministri Edi Rama i ka ‘shtrirë dorën’ opozitës, për të bashkëpunuar në këtë legjislaturë të re. Këtë ftesë e argumentoi me faktin se mund të ulen në tryezë për të mirën e vendit. I ftuar në studion e emisionit “Opinion” në Tv Klan, Rama tha se ftesa ndaj opozitës nuk bëhet nga nevoja apo halli, por për të mirën e Shqipërisë.
“Nuk kam asnjë vijë të kuqe. E ftoj opozitën për të punuar së bashku, dhe nuk kam asnjë kufizim. Nuk e ftoj nga nevoja apo nga halli. Unë di çfarë vendi nuk ka nevojë, nuk ka nevojë politikën e konfliktit permantet. Unë kam vendosur ta filloj edhe vetë nga klasa e parë daljen nëpër studio.
Është e rëndësishme që ne të ulim konfliktin politik sa të mundemi, jo për mua, se në konflikt politik unë nuk ndihem ngushtë, por mendoj që kjo nuk i duhet vendit. Unë që kur kam hyrë, i kam thënë vetes është hera e parë që shkoj në një studio dhe përpiqu të jesh sa më i sjellshëm, mos jesh arrogant, sepse brenda meje nuk jam por nuk e reflektoj si duhet atë që jam. Ja për shembull, kjo është një përpjekje”.
Një nga shtyllat kryesore të aksionit të opozitës është ndryshimi i Reformës Territoriale dhe kryeministri Edi Rama është shprehur se është i gatshëm që të ulet në tryezë me PD-në, për të diskutuar. Ai tha se është i gatshëm që sot, për ta bërë një gjë të tillë, duke konfirmuar gatishmërinë e tij për një “bashkëpunim”, me opozitën për reformat kryesore të vendit.
“Ne themi se duhet të kemi më pak Bashki, ata më shumë. Megjithatë jemi të gatshëm që të ulemi me opozitën për Reformën Territoriale që tani”, deklaroi Rama.
