Rama nuk i dha Vangjush Dakos besimin për një tjetër mandat. Në takimin “Bashkia që Duam” që u ndal këtë pasdite në Durrës, nuk pati një konfirmim nga kryeministri Rama për të. Ndonëse vlerësoi punën e bërë nga Dako, Rama nuk konfirmoi emrin e kandidatit për Bashkinë e qytetit bregdetar.
Nga Durrësi, ku ka folur gjatë ndalesës së radhës të ciklit kombëtar “Bashkia që duam”, Rama ka ripërsëritur edhe njëherë qëndrimin e tij të palëkundur sa i përket zgjedhjeve lokale të 30 qershorit.
“Ne jemi duke u përgatitur për zgjedhjet e 30 qershorit, do shkojmë për ato shumë gjëra që duhet të bëjmë. Përpara 4 vitesh ju kemi thënë do zgjidhet problemi i kanalizimeve, dhe do jetë drejt zgjidhjes furnizimi me ujë, dhe kjo ka ndodhur. Do transformojmë Porto Romanon në një park të ri.
Nuk diskutohet se janë një sërë projektesh të mira të kësaj Bashkie, falë Vangjushit që ka pasur projekte. Kështu që mos dëgjoni; jo po do bëhen zgjedhje të parakohshme, jo po do shtyhen, jo po do vijnë ndërkombëtarët do thonë meqë po qan Luli jepi biberonin. I dhamë 15 biberonë para dy vitesh, ai prapë nuk rritet. Le të rrijë në rrugë dhe të forcohet të bëhet gati më 2021. Se dëgjova dhe këtë juristin Bylykbashin, jo nuk hyjmë në zgjedhje: Ti mos hy se i humbur del prapë. Ne do i bëjmë zgjedhjet si me ata, si pa ata. Sa herë ju ka rraf Dako kur e kishit ju qeverinë? Niçja ishte me ju, po kjo nuk na shqetëson. Nuk është detyra jonë të rrisim opozitën. Vazhdojmë rrugën përpara për Durrësin që duam”, deklaroi Rama, duke mos e rikandiduar Dakon.
TIRANA TODAY
