Duke folur në aktivitetin për “Trashëgiminë Kulturore” në Ditën e Evropës, kryeministri Edi Rama tha se do të ishte më e lehtë nëse do të kishte negociata për tu bërë pjesë e SHBA, pasi nuk do të duhej të bindeshin 27 koka.
“Po të kishte negociata për tu bërë pjesë e SHBA, mund të kishte qenë më e lehtë, mbase. Sepse nuk do të duhej të bindnim 27 koka dhe sot më vjen mirë të kujtoj se presidenti i Këshillit Evropian para pak ditësh këtu në Tiranë gjeti fjalët, jo vetëm më të mira, po dhe më të goditura për të na inkurajuar në këtë proces ku tha se sot ne jemi mbase shumë më evropianë se të tjerë që janë pjesë e BE-së”, tha ai.
Duke folur për zyrtarë gjermanë që kanë folur me skepticizëm për anëtarësimin e Shqipërisë, Rama tha se janë koka lajmesh në Shqipëri, por në vendin e tyre nuk u bie radha.
“Nuk ka diskutim se për Shqipërinë sot, dhe fëmijët tanë nesër ky është projekti më pozitiv i imagjinueshëm për të cilin ia vlen çdo sakrificë, çdo përpjekje dhe i gjithë durimi për të dëgjuar edhe më të fundit fare, që bëhet personazh dhe zë i ekraneve dhe lajmeve të para në Shqipëri ndërkohë që në vendin e vet si bie radha kurrë të dalë në lajme”, tha Rama.
Ndërsa nga ana tjetër Rama ka ironizuar deputetet e Holandës që erdhën për të mbledhur fakte, në kuadër të skepticizmit për çeljen e negociatave të vendit tonë me BE.
“Më vjen për të qeshur kur vijnë delagacione për të mbledhur fakte, më takojnë mua, ca deputetë dhe mikun tim të shtrenjtë me të cilin na bashkon në rrugë të ndryshme dashuria për Hollandën, Lulzim Bashën dhe largohen dhe mbledhin fakte. Çfarë lloj faktesh mund të mblidhen në gjysmë dite, ndërkohë që KE është një ushtri ekspertësh dhe burokratësh të panumërt të hane fakte, pinë fakte dhe dëgjojnë vetëm fakte”- tha ai, duke falënderuar gjithë ata qe kanë dhënë mbështetjen e tyre, por edhe duke çmuar punën e madhe të bërë nga BE e KE, që sipas tij “na kanë nxjerrë ujin e zi me 5 prioritetet”.
