Ish-kryetari i Partisë Demokratike, Lulzim Basha ka denoncuar koncesionet e reja për dy akset rrugore në vend, që do t’i kushtojnë buxhetit të shtetit 328 mln euro. Bëhet fjalë për akset Milot-Balldren dhe Orikum – Dukat.
Në një deklaratë për mediat, Basha theksoi se të gjitha koncesionet e dhëna janë monopole afatgjata. Sipas tij, këto monopole të ngritura, do të godasin konkurrencën, duke mos i lënë vend biznesit të vogël. Ai akuzoi Partinë Socialiste, veçanërisht kryeministrin Rama, për të cilin tha se është hajduti më i madh që ka njohur Shqipëria. Ndërsa e quajti Ramën një grabitës psikik, Basha tha se koncesionet kriminale janë gjithashtu rrezik për sigurinë kombëtare.
Kreu demokrat shtoi më tej cili do të jetë qëllimi i demokratëve, ndërsa theksoi se hetimi i tyre do të përfshijë edhe pasurinë e zyrtarëve dhe ish-zyrtarëve.
“Trafiku i qenieve njerëzore janë të lidhura me politikat kriminale të Edi Ramës. Zhdukja e kriminelëve është emergjencë.
Ne do të marrim një operacion të gjerë, të pa parë dhe të pa dëgjuar ndonjëherë. Qëllimi ynë do të jetë hetimi i kontratave mashtruese. Çdo kontratë koncesionare, çdo kontratë shtetërore do të konsiderohet një vepër kriminale. Çdo person privat dhe publik, do t’i hetohet pasuria dhe të ardhurat. Hetimi do të përfshijë pasurinë e zyrtarëve dhe ish-zyrtarëve.
Paratë që kanë përfunduar në Qipro e Romë, do të zbulohen dhe do t’ua sjellim shqiptarëve. Ne jemi në kontak me agjencitë kryesore për luftën kundër krimit ndërkombëtar”, deklaroi Basha.
