Pak javë më parë kryeministri Edi Rama lavdëroi publikisht kryebashkiakun e Tropojës Besnik Dushajn, duke thënë për të se ai ka punuar mirë.
“Kujt t’ia lëmë Shkodrën, më thoni ju mua. Se thonë na pengon qeveria me fondet. Me kryebashkiakun e Tropojës për shembull, kam bashkëpunuar shumë mirë, është 24 karat demokrat, por është njeri i zoti. Ne synojmë të gjitha bashkitë, ne nuk i ndajmë njerëzit kur vlerësojmë punën, është shumë e thjeshtë”, ka thënë Rama asokohe.
Mirëpo vetë Kryetari i Bashkisë së Tropojës nuk duket se ndan të njëjtin mendim për Ramën.
Ditën e sotme Gjykata e Tropojës ka lënë në burg 3 protestues të cilët kanë hyrë në KZAZ-të e rrethit verior të vendit.
Lidhur me arrestimin e tyre ka reaguar kryebashkiaku i Tropojës duke trumbetuar ashpër ndaj Partisë Socialiste: “Gjykata e Tropojës, nën presionin e qeverisë kriminale të ‘Rilindjes’, dha vendimin e burgosjes politike për tre protestues të pafajshëm”.
Postimi i Besnik Dushajt:
“Ditën e sotme, Gjykata e Tropojës, nën presionin e qeverisë kriminale të “Rilindjes”, dha vendimin e burgosjes politike për tre protestues të pafajshëm, Amarildo Gecaj, Ndriçim Ndrepepaj dhe Arbër Ulndreaj, që u ngritën në mbrojtje të lirisë dhe demokracisë, në mbrojtje të Kushtetutës së Republikës së Shqipërisë.
Thirrja ime, thirrja e çdo njeriu që mbron lirinë dhe demokracinë e vendit të tij, është për bashkimin më të madh që Shqipëria ka parë ndonjëherë, ditën e sotme në orën 20:00, në bulevardin “Dëshmorët e Kombit”, për t’i dhënë përgjigjen e merituar kësaj klike kriminale që po instalon diktaturën.
Shqipëria e NATO-s, Shqipëria e lëvizjes së lirë, Shqipëria e demokracisë që pret të bëhet pjesë BE-së nuk mund dhe nuk do të nënshtrohet, nuk mund dhe nuk do të kthehet pas në vitet e errëta të diktaturës. Detyra jonë, detyra e çdo qytetari të Republikës së lirë dhe demokratike të Shqipërisë, është mbrojtja e këtyre vlerave të fituara me kaq mund. Ne duhet dhe do ja dalim! E drejta do triumfojë mbi padrejtësinë, liria do triumfojë mbi diktaturën! Fitore!”
