Kryeministri Edi Rama ka paralajmëruar qytetarët se varianti i ri Omicron është në qarkullim, ndaj duhet të përgatitemi për një valë të re Covid. Duke bërë një bilanc të situatës, Rama tha se nuk mund të sillemi sikur nuk është asgjë dhe mbase disa masa do duhen rimarrë, pa e shtrënguar zinxhirin e jetës dhe ekonomisë. Ai solli në fokus rastin e Holandës, ku është mbyllur deri më 14 mars për shkak të fluksit në rritje të infektimeve dhe marrjen e masave për mos bllokim të sistemit shëndetësor.
“Deri tani ia kemi dalë arsyeshëm duke garantuar një jetë goxha të çliruar nga shtrëngesat dhe duke i dhënë mundësi ekonomisë që të fluturojë faktikisht, për t’u ringritur nga humnera ku u gjendëm të gjithë botërisht vitin e shkuar. Duhet të theksoj se jemi në kushtet kur duhet të përgatitemi për një valë të re, për shkak të një versioni të ri të virusit që po mbyll vendet e tjera. Ju i keni parë, Holanda është mbyllur deri më 14 mars.
E paimagjinueshme dhe kështu vendimet për mbyllje po merren radhazi vend pas vendi. Ne nuk do të ngutemi, veçse duhet ta dimë që nuk mundet dot ta kalojmë sikur nuk është asgjë dhe mbase disa masa do duhen rimarrë pa e shtrënguar zinxhirin e jetës dhe ekonomisë siç e keni parë”, tha Rama. Kreu i qeverisë u shpreh se janë garantuar dozat e vaksinave, ndërkohë që po bëhet edhe një vlerësim për personat që janë vaksinuar jashtë vendit.
