Kryeministri Rama deri më tani i ka dërguar 6 letra publike kryedemokratit Basha, për gjetjen e një gjuhe të përbashkët. Pas raportit të KE, ambasadori i BE, Luigi Soreca dhe kryeministri i vendit Edi Rama kanë dalë në një konferencë për mediat, ndërsa ky i fundit iu përgjigj interesit të mediave lidhur edhe me propozimin e fundit të presidentit Meta.
Pak ditë më parë, Presidenti i Republikës Ilir Meta përsëriti shqetësimin e thellë mbi krizën kushtetuese, institucionale, politike dhe të përfaqësimit ku ndodhet vendi. Meta tha se është i gatshëm që në përputhje me kompetencën që i jep shkronja “gj” e nenit 92 të Kushtetutës, të rishikojë Dekretin për caktimin e datës së zgjedhjeve vendore, dhe të dekretojë një datë tjetër për zhvillimin e tyre.
Lidhur me këtë çështje, Rama tha se përkundër propozimit të Metës, zgjedhjet do të mbahen në 30 qershor.
“Përsa i përket President të Republikës, presidenti ka shprehur një gatishmëri për tu vënë në dispozicion në zgjidhje me pëlqimin e partive politike. Sepse kështu e përcakton edhe Kushtetuta. Më lejoni t’ju përsëris se PS, shumica qeverisëse nuk ka as një pëlqim, as një strukturë për shtyrje të datës se zgjedhjeve.
Në 30 qershor, duhet të vijë Shqipëria institucionale dhe Kushtetuese, e cila nuk mund të merret peng, dhe nuk mund ti nënshtrohet agjendave partiake. Në këtë aspekt, në raport me presidentin, mbetem i bindjes se i duhet dhene Cezarit ate qe meriton Cezari.
Ne nuk kemi datë për të negociuar, dhe nuk kemi Kushtetute per te anashkaluar. Përsa i përket letrave, thonë; por mbase do të ketë edhe një të shtatë. Në të gjashtë ftesat për ti hapur rrugë dialogut, normalizimit të marrëdhënieve me opozitën, jam përpjekur të bëj me të mirën. Në 1 qershor, PS do të fillojë fushatën për zgjedhjet e ardhshme, por në një betejë si do të jetë Shqipëria e gjeneratës së re”.
