Kreu i qeverisë Edi Rama ka njoftuar bashkëbisedim me qytetarët për çështjen e energjisë dhe karburanteve, për të cilën pati edhe një protestë. Rama bën me dije se bashkëbisedimi do të jetë sot në orën 18:30.
“Le të dëgjojmë njëri-tjetrin. Kriza ndërkombëtare e energjisë dhe impakti i luftës mbi naftën”, shkruan Rama.
Dje qytetarët dolën në protestë kundër rritjes së çmimeve në të gjithë vendin. Me dhjetra qytetarë u mblodhën fillimisht para Kryeministrisë, ku mbajtën fjalën e tyre shumë aktivistë dhe qytetarë të thjeshtë që i kërkuan qeverisë të dëgjojë zërin e tyre dhe të ndërhyjë për të ndalur çmimet abuzuese.
Protestuesit kanë njoftuar se do të protestojnë çdo ditë para Kryeministrisë, por edhe në disa qytete të vendit, teksa protesta do të kulmojë të shtunën në orën 11:00.
