Kryeministri Edi Rama ka folur nga Cërriku, ku u bë prezantimi i kandidatit të PS-së për kryetar Bashkie, Andi Salla. Por, gjatë fjalës së tij, kryeministri nuk tha asnjë fjalë për përgjimet e publikuara nga Bild, por zgjodhi që të sulmojë gjatë gjithë kohës opozitës së bashkuar.
Rama pohoi se nuk janë pa gabime, por “më të mirë se ata nuk ka”, ndërsa theksoi se zgjedhjet do të mbahen më 30 qershor. Edhe pyetjes së gazetarëve dje lidhur me skandalin e përgjimeve, Rama ka zgjedhur të mos i përgjigjet, por është larguar me një buzëqeshje.
Fjala e Ramës:
4 vjet kryetar bashkie m’Tironë, Luli e kishte sahatin mbi zyrë dhe 4 vjet, Tirona ngeli pa orë. Ne këtu bëmë çmos ta mbështesim kryetarin e Bashkisë dhe së paku u bë transformimi në zonë urbane, por sapo u bashkuan me Lulin, iu ngeli ora. Dhe duan tani që gjithë Shqipëria të punojë me orën e tyre, një orë pa akrepa, një orë ku askush nuk e kthen dot më mbrapa Shqipërinë.
Edhe demokratët me dy fije mend në kokë e kanë kuptuar se ata kanë frikë nga zgjedhjet. E kanë kuptuar që ata kanë frikë të dalin para popullit, të thonë çfarë kanë bërë, çfarë kanë ndër mend të bëjnë dhe të tregojnë se sa të zotë janë për t’i bërë gjërat. Shqiptarët e dinë se sa të zotë janë ata kur u jep një punë. Në vend që të dalin para popullit e të thonë pse e duan votën, kërcënojnë duke thënë si do ndalojnë zgjedhjet.
Ata nuk kanë ide, nuk dinë të logjikojnë me argumente dhe mendojnë se do përdorin logjikën e molotovit.
Ata janë të lirë që të vendosin për veten e tyre dhe nqs vendosin të vrasin veten, ne nuk i pengojmë dot. Thonë si mund të bëhen zgjedhjet pa ata. Nqs shkaku do ishim ne, zgjedhjet do ishin antidemokratike, por kur kanë vendosur ata, zgjedhjet pa ata nuk janë antidemokratike.
Nga e drejta e popullit për të gjykuar, në të drejtën e partive për të luajtur me Kushtetutën si top lecke, dhe me popullin si mund t’ju vij përmbarë. Zgjedhjet do bëhen në 30 qershor. Imagjinoni edhe tjetrën që çfarë do ndodhte sikur ne të pranonim imponimin e logjikës së dhunës, forcës, kërcënimeve, gjithçkaje që nuk është demokratike. Kjo do të thoshte që ti hapim rrugë politikës destruktive, që çdo parti që është në opozitë dhe nuk e do qeverinë. Por nuk ka durim që të presin kur vijnë zgjedhjet, por djegin mandatet, pastaj përshkallëzon dhunën.
Kjo nuk është parë asgjëkundi, dhe nuk do shikohet as këtu. Për më tepër, ne padiskutim që kemi gabimet tona. Ne padiskutim që kemi shumë gjera për të bërë, ne nuk jemi më të mirët e mundshëm, por ama më të mirë se ne, as s’ka pas, as nuk ka. Nga ana tjetër, shikojeni vetë, do jenë gjithmonë e më pak çdo ditë. Se ata kanë edhe një problem tjetër, nuk rinë dot pa dhunë. Dhe kush nuk i del përballë, rrahin njëri-tjetrin.
Janë shumë të trembur, dhe janë të alarmuar nga reforma në drejtësi, sa janë kthyer njësoj si ‘Beni ecën vetë’, që këndon, që dëgjon zërin e vetë dhe të ndjejë frikën nga errësira. Kur ulërasin e kanë nga frika. Kanë hyrë në panik.
Pastaj shikojeni, i keni parë edhe në Elbasan, 30 vjet. Sa herë u ka ardhur mundësia të drejtojë një punë, i prish. Ne sa herë na vjen mundësia, i rregullojmë. Sa herë e kanë pasur drejtimin e vendit, ose të një komune, vetëm kanë hapur plagë.
Ne jemi munduar të kurojmë plagën e tyre. Ata shkatërrojnë ekonominë, hap nga të katër rrugët kantier. Ne sa herë na është dhënë mundësia e fillojmë nga e para, humbasin kohë dhe energji për të shlyer borxhet. Ne shërojmë plagë të tyre. Kjo histori nuk mund të vazhdojë më. 30 vjet janë boll.
Ka kurajën dhe respektin për popullin që të ecë në rrugën e demokracisë, ballafaqimit demokratik dhe preferon rrugën, do mbetet në rrugë sepse rrugës meriton të mbetet. Ja ku është Elbasani afër. A e keni parasysh se çfarë bëmë vetëm në 6 vite të qeverisjes sonë, transformim rrënjësor./ Tirana Today
