Rakipi: Do vijë dita që një avion të quhet Elisa Spiropali

Gazetari Ylli Rakipi e ka cilësuar Ramën si një ndër diktatorët më të këqinj. Në studion e “Provokacija”-s të Mustafa Nanos, Rakipi theksoi se regjimi ku po jetojmë tani, ka marrë të gjitha pushtetet.

“Ne jetojmë në një regjim në këto momente që po flasim. Nuk është një regjim me çizme me spaleta që i ka marrë të gjitha pushtetet. Ka vetëm një njeri që atij i duhen të gjithë pushtetet”.

I pyetur nga moderatori i emisionit se çfarë ka uzurpuar Rama, Rakipi përgjigjet se kryeministri ri gjithë ditën më oligarkë. Madje ai shtoi më tej se kryeministri  ka mbushur Parlamentin me njerëz qesharakë.

“Edhe diktatorët janë të rendësishëm për vendet e tyre. I drejtojnë ato, por nuk i hedhin në humnerë. Por këtu kemi një vend të flakur në humnerë. Këtu për shembull, këtu shikon një njeri që rri gjithë ditën me këta që Lulzim Basha i quan oligarkë.

Ka mbushur Parlamentin me njerëz me qesharakë në botë. Këtu ka 30 vjet që s’ka shkolla. Ky shkon me atlete tek presidenti Macron, por këtu nuk mbillet ndonjë bimë bujqësore këtu? Këtu kultivohet vetëm kanabis. Është narkoshtet. Lulzim Basha nuk e ka bërë këtë. As Berisha nuk e ka futur krimin në Parlament”.

Në këndvështrimin e Rakipit, Rama torturon edhe të vdekurit. Këtu ai përmend emrat e mëdhenj si Lasgushi apo Migjeni, që i ngre nëpër avionë. Sipas tij, nëse vazhdon kështu, do të vijë dita që një avion të quhet Elisa Spiropali. Në vazhdën e akuzave, Rakipi tha se Rama duket një diktator qesharak. Por sipas tij, është një diktator që e ka çuar këtë vend në greminën më të madhe që ekziston.

“Ky merr emrat e Migjenit, emrat e Lasgushit dhe ata i torturon si të vdekur që janë. I ngre nëpër avionë fals. Meqenëse ka ardhur nga Turqia, merr dhe gazetarët dhe i hip tek Lasgushi tek Migjeni.

Po vazhdoi kështu, do kesh emër avioni edhe “Elisa Spiropali”. Nuk qeveriset në asgjë. Duket një diktator qesharak, në fakt është një diktator që e ka çuar këtë vend në greminën më të madhe që ekziston.

Migjenin dhe Lasgushin i ngriti në ajër, kurse bisedon gjithë ditën me Rrahman Rrajën. E pe ti çfarë ndodhi në autostradë? Përmbyset makina me prokuror brenda, dhe vrasës brenda dhe gjenden dosjet. As në filmat e hollivudit nuk i bën këto skenare. Edhe më i miri prej regjisorëve nuk i bashkon kaq shumë elemente në një film”.