Shteti ka hequr dorë nga 3800 rekurse në Gjykatën e Lartë. Ministri Ulsi Manja ka dekalruar se heqja dorë, u bë në bazë të një udhëzimi të miratuar këtë të enjte nga qeveria. Vendimi u mor si një masë për të ulur stokun e dosjeve në Gjykatën e Lartë, që numërohen mbi 35 mijë.
Qeveria ka miratuar vendimin në të cilin, qytetarët që kanë fituar gjyqin pasi janë hequr nga puna, do të kompensohen. Udhëzimi detyron administratën shtetërore, të heqë dorë nga 3.800 çështje për të cilat kishte bërë rekurs në Gjykatën e Lartë kundër ish-nëpunësve që kanë fituar në 2 shkallët e drejtësisë deri në 40 paga minimale dëmshpërblim. “Me këtë udhëzim, sapo të hyjë në fuqi, ne presim që Gjykata e Lartë të lehtësohet nga rreth 3800 dosje që presin të gjykohen, ndërkohë 1 mijë të tjera janë akoma në proces. Prej katër vjetësh, stoku i dosjeve të pashqyrtuara në Gjykatën e Lartë, është raportuar si problematik. Ky stok dosjesh nuk lindi sot, ka ekzistuar edhe në kohën kur Gjykata e Lartë funksiononte me kapacitet të plotë. Por erdhi dhe u rëndua pas boshatisjes së Gjykatës së Lartë për shkak të procesit të Vettingut, ku nga 19 gjyqtarë, me dorëheqje, apo për shkak të largimit prej procesit të Vettingut, Gjykata e Lartë, për disa kohë ishte jo funksionale”, ka thënë Manja.
Nga ana tjetër, ministri Ulsi Manja u shpreh se do të hiqet dorë edhe nga çështjet me natyrë administrative, që kanë të bëjnë me ndryshim, shfuqizim, apo konstatim të pavlefshmërisë absolute të akteve administrative. Apo kur detyrohet organi administrativ për të nxjerrë aktet. Ai tha se në çdo rast, vlera e disponimit të gjykatës nuk duhet të jetë më tepër se sa 40- fishi i pagës minimale. “Kushti i vetëm për heqjen dorë nga rekurset, ka të bëjë me vlerën e disponimit të gjykatës. Në çdo rast, vlera e disponimit të gjykatës nuk duhet të jetë më tepër se sa 40- fishi i pagës minimale”, ka shpjeguar Manja. Përgjithësisht rekurset nga duhet hequr dorë kanë të bëjnë me zgjidhjen e mosmarrëveshjeve të punës, me njohjen, apo vërtetimin e vjetërsisë në punë, apo në paditë me shpërblim dëmi. Po ashtu udhëzohen të heqin dorë edhe nga paditë e tjera, ku pavarësisht kërkimeve, shteti e ka humbur në të dy shkallët e gjykimit çështjen.
