Shtabi i krizës së koronavirusit në Serbi është tërhequr nga masat e paralajmëruara për zbatimin e orës policore.
Vendimi vjen pas dy netësh trazira në Beograd, të cilat u nxitën nga zemërimi i publikut për reagimin e qeverisë ndaj pandemisë.
Kryeministrja Ana Brnabiq shpalli sot masat e reja për frenimin e pandemisë, të përcaktuara nga shtabi i krizës. Ajo theksoi se tubimi i më shumë se dhjetë njerëzve në publik, do të ndalohet në Beograd, si në ambiente të mbyllura, ashtu edhe të jashtme.
Masat e tjera përfshijnë ruajtjen e distancës fizike dhe ndalimin e punës në objekte të mbyllura nga ora 21:00 deri në orën 06:00. Ndërsa ambientet e hapura, si parqet, do të mbyllen nga ora 23:00 deri në orën 06:00.
Brnabiq sqaroi se këto masa vlejnë vetëm për Beogradin, ku situata e pandemisë është edhe më kritike.
“Ne nuk kemi më kapacitete spitalore për të pranuar pacientë në Beograd. Do të paguajmë çmimin për atë që ndodhi mbrëmë dhe një ditë më parë [në protesta]. Do të shohim se sa njerëz janë infektuar. Do ta shohim në 5, 6 apo 10 ditët e ardhshme”, tha ajo.
