Kryeministri Edi Rama njoftoi sot akordimin e një shpërblimi për të gjithë ushtarakët që u përfshinë në operacionin e përmbytjeve një ditë më parë. Në një ceremoni në ambientet e Ministrisë së Mbrojtjes ai bëri të ditur se nga vitin i ardhshëm do të akordohet edhe një rritje e konsiderueshme pagash për ta.
“Sot qeveria do të vendosë një shpërblim si shprehje mirënjohje për të gjithë ata që u përfshinë në operacionin fantastik që shteti përballoi, në mënyrë që të gjitha familjet e ushtarakëve, në radhë të parë të atyre që ishin në vijën e zjarrit, të ndihen mirë në këtë fundviti. Dua të angazhohem sot para jush që viti 2018 do të jetë viti i fundit që do të ketë rrogat ekzistuese për ju. Ne jemi të vendosur të rrisim buxhetin e ushtrisë. Vitin e ardhshëm do te akordohet rritje e konsiderueshme pagash për ushtaraket”, tha Rama.
Më tej në fjalën e tij Kryeministi u shpreh se: “Ditëlindjen e 105 të FA nuk mundëm ta celebronim në mënyrën tradicionale sepse e kaluam në operacionet e shumta si pasojë e reshjeve dhe prurjeve të jashtëzakonshme të lumit të Vjosës, të cilat sollën dëme dhe kërcënuan jetë njerëzish. Falë jush, falë atyre që ishin qysh në sekondën e parë në krye të detyrës, ditë natë, në frontin më të vështirë ku rrezikohej jeta e tyre, ne ia dolëm që të shpëtojmë të gjithë personat dhe familjet e kërcënuara për jetën dhe ndërkohë të mos lejojmë që asnjë kokë bagëti të humbasë.
Duke qenë se në 4 dhjetor situate nuk na dha mundësinë të mblidhemi së bashku jam këtu sot për tu uruar të gjithëve ju festën e Forcave të Armatosura, e cila nuk mund të kremtohej në mënyrën më kuptimplotë sesa në vijën e parë ku të gjithëve ju iu çoi në 4 Dhjetor detyra.
Mirënjohje dhe respekt edhe për Ministren e Mbrojtjes që bëri detyrën, por përkushtimi dhe aftësia me të cilën përballoi këto momente të vështira e bëjnë të paevitueshme shprehjen e falënderimit për të. Mirënjohje të gjitha vendeve mike të rajonit, që pa ua kërkuar askush u përfshinë në përpjekjen e solidaritetit të vendit tonë dhe njerëzve të prekur nga fatkeqësia natyrore. Kosova nuk diskutohet, por edhe Serbia, Maqedonia, Mali i Zi”.
