Tashmë procesit të Vettingut do t’i nënshtrohen edhe noterët, përpos gjyqtarëve e prokurorëve. Pas mbledhjes së Këshillit të Ministrave, Ministri i Drejtësisë, Ulsi Manja tha dje për mediat se personat të cilët kanë lidhje apo kontakte me botën e krimit, nuk do të lejohen që të ushtrojnë profesionin e noterit.
Qeveria “Rama 3” do të fusë në Vetting të gjithë, pasi në mbledhjen e djeshme të Këshillit të Ministrave janë miratuar disa ndryshime në ligjin për noterinë, dhe që do të duhet të miratohet në Parlament, ku parashikojnë një kontroll të detajuar për lidhjet e noterëve me persona të inkriminuar.
“Ky pr/ligj ka për qëllim forcimin e integritetit të profesionit të noterit, dhe që lidhet me besueshmërinë e publikut te ky shërbim. Nëpërmjet këtyre ndryshimeve përcaktohen kritere të reja për futjen në profesionin e noterit, dhe që kanë të bëjnë me mospërfshirjen në këtë sistem të personave që kanë lidhje apo kontakte të papërshtatshme me krimin e organizuar ose persona të dënuar për kryerjen e veprave penale të rënda dhe këtyre kritereve të reja do t’i nënshtrohen edhe noterët që tashmë janë pjesë e shërbimit noterial nëpërmjet inspektimeve proaktive që do të ushtrojë Ministria e Drejtësisë”, deklaroi Ministri i Drejtësisë, Ulsi Manja.
Vendimi i Këshillimit të Ministrave
Në pikën 2 të nenit 4 në projektligjin për noterinë, bëhet e ditur se personat që aspirojnë të bëhen noterë dhe që kanë kontakte me njerëz të botës së krimit, nuk iu jepet licenca, ndërsa ata që janë pjesë e sistemit iu hiqet kjo e drejtë. “Ministri i Drejtësisë vendos që i interesuari nuk kalon procesin e verifikimit të integritetit dhe besueshmërisë profesionale kur: subjekti i verifikimit ka kontakte të papërshtatshme me persona të përfshirë në krimin e organizuar ose në kryerjen e veprave të rënda penale; ka shfaqur sjellje të rënda të papërshtatshme etike dhe morale që cenojnë besimin e publikut në sistemin noterial; ose ka ndonjë shkak tjetër përjashtues, sipas përcaktimit të legjislacionit në fuqi”, thuhet në projektligj.
