Më në fund edhe Franca ka shënuar një ulje mjaft të ndjeshme, në numrin e viktimave nga koronavirusi.
Pas dy ditëve (2 dhe 3 prill) ku shënoi më shumë se 1 mijë viktima brenda 24 orëve, bilanci në dy ditët e fundit duket të ketë ndryshuar.
Sipas mediave franceze, ditën e djeshme janë regjistruar 441 të vdekur, ndërsa në 24 orët e fundit janë shënuar 357 viktima. Deri më tani në Francë janë regjistruar rreth 8 mijë viktima nga COVID-19.
Nga këta: 5,889 persona vdiqën në ambiente spitalore, kurse 2,189 të tjerë në kushte shtëpiake.
Në Francë janë regjistruar gjithsej më shumë se 90 mijë raste infektimi. Rreth 70 mijë raste janë ende aktive, ndërsa rreth 16 mijë persona janë shëruar.
Më 2 prill në Francë u regjistruan 1,355 viktima brenda 24 orëve, shifra më e lartë e shënuar se në çdo shtet tjetër.
Franca mban vendin e katërt në botë për numrin më të madh të viktimave nga koronavirusi, pas Italisë, Spanjës dhe SHBA-ve.
Më shumë se 1,2 milionë raste infektimi janë regjistruar në të gjithë botën, ndërsa numri i viktimave ka shkuar në 68,468.
