Kreu i Shtetit, Ilir Meta, ka dekretuar dje qeverinë e re “Rama 3”. Në 11 shtator, presidenti Meta dekretoi emërimin e Edi Ramës si kryeministër të Shqipërisë, ndërsa dy ditë më pas, ai iu drejtua me një shkresë zyrtare Prokurorisë së Përgjithshme dhe Prokurorisë së Posaçme, ku kërkonte që t’i vinin në dispozicion çdo të dhënë në lidhje me proceset hetimore apo penale, që mund të ishin nisur për emrat e propozuar për ministra të rinj në qeverinë “Rama 3”.
Prokuroria e Përgjithshme dhe SPAK, iu përgjigjën kërkesës së presidentit, duke e vënë atë në dijeni se asnjë nga emrat për ministra nuk është proceduar. Pas marrjes së njoftimit, Meta ka dekretuar qeverinë “Rama 3”, dhe ia ka dërguar dekretin Kuvendit të Shqipërisë.
PS s’ka humbur kohë, ndërsa ka kërkuar menjëherë mbajtjen e seancës parlamentare për votimin e emrave të dekretuar nga presidenti Ilir Meta një ditë më parë. Mësohet se Partia Socialiste do të kërkojë në konferencën e kryetarëve të Kuvendit, mbajtjen e seancës së Parlamentit më 16 shtator dhe ndërkohë do të kërkojë që të premten të zhvillohet betimi para presidentit Meta. Arsyeja është se Edi Rama ka parashikuar që të udhëtojë drejt SHBA-ve, për të marrë pjesë në punimet vjetore të Asamblesë së OKB-së.
Votimi i qeverisë dhe i programit do të diskutohet në konferencën e kryetarëve, dhe se pritet qëndrimi i opozitës në lidhje me këtë çështje, nëse do të kërkojë më tepër kohë apo më shumë orë debat në dispozicion.
Në dekretin që është publikuar në faqen zyrtare të Presidencës, Meta bën me dije se ka dekretuar të gjithë ministrat, duke u dhënë atyre mundësinë që të nisin zyrtarisht detyrën. Presidenti Meta ka dekretuar ministrat 4 ditë para skadimit të afatit. Tani pritet që të mblidhet Kuvendi dhe të bëjë votimin e qeverisë së re.
