Prej dekadash, kafshët e rrugës në qytetet shqiptare janë një problematikë e madhe, për të cilën autoritetet ende nuk kanë gjetur një zgjidhje.Por teksa në rrjetet sociale janë bërë gjithnjë e më të shpeshta imazhet e keqtrajtimit të qenve apo maceve të rrugës, një video e publikuar së fundmi nga organizata për mbrojtjen e kafshëve në Shqipëri “ARSA” i ka prekur të gjithë.
Në videon në fjalë, shihet një qenushe, e cila me një durim të habitshëm, pret përpara një lokali, teksa një djalë del prej derës dhe i afron në gojë një qese ushqim.
Teksa shpreh gëzimin me bishtin që i tundet, qenushja i lë të gjithë gojëhapur.
Ajo merr qesen dhe largohet me qetësi si të ishte njeri.
Por ushqimin mesa duket nuk e kishte për veten, pasi siç shkruhet në përshkrimin e videos të postura nga ARSA, ajo e ka çuar atë tek të vegjëlit e saj.
“Banorët më të mirë të Tiranës! Kjo është një qenushe rrugësh e bërë nënë që i çon ushqimin të vegjëlve të saj.”-shkruhet në përshkrimin e videos nga organizata që çdo ditë, nëpërmjet vullnetarëve të saj dhe ndihmës së qytetarëve, u vjen në ndihmë kafshëve.
