Efektivi i policisë që qëlloi për vdekje 25-vjeçarin Klodjan Rasha, është vënë në pranga. Deri në marrjen e këtij vendimi, ai po merrej në pyetje në Drejtorinë e Policisë së Tiranës. Punonjësi i policisë, efektiv i Shqiponjave, i ka bërë thirrje të riut të ndalonte, por Rasha nuk i është bindur urdhrit për të ndaluar dhe efektivi e ka qëlluar.
25-vjeçari u qëllua shumë afër shtëpisë së tij, rreth orës 1 e 45. Ndërkohë arma e Rashës, siç njoftoi policia është gjetur 100 metra nga vendi i ngjarjes, ç’ka tregon se nuk ka patur shkëmbim zjarri me policinë.
Si pasojë e plagëve që ka marrë i riu, ka ndërruar jetë në spital. Në dëshminë e tij, efektivi ka thënë se ka dashur ta ndalojë të riun pasi ka thyer orën policore, e jo ta vrasë, por 25 vjeçari e ka kërcënuar dhe është larguar me vrap. Ai është nisur ta qëllojë në pjesën e poshtme të trupit, por kur ka gjuajtur herën e dytë, nga errësira nuk e ka parë se ku e kapur plumbi.
