Një 28-vjeçar ka rënë në prangat e policisë, pasi një natë më parë ka qëlluar me armë zjarri në ajër në aksin rrugor Burrel – Klos. Ngjarja ka ndodhur në orët e vona të natës dhe ka krijuar panik te banorët e zonës.
“Shërbimet e Policisë së Matit, pas marrjes së informacionit se në aksin rrugor Burrel -Klos ka të shtëna me armë zjarri, menjëherë kanë organizuar punën dhe falë reagimit në kohë si dhe informacioneve të marra në rrugë operative, kanë bërë të mundur kapjen dhe arrestimin në flagrancë të shtetasit: F. Ll., 28 vjeç, lindur dhe banues ne fshatin Suc, Bashkia Klos.”, njofton policia.
Arrestimi i tij u bë pasi më datë 29.06.2019, në orët e vona të mbrëmjes, në aksin rrugor Burrel-Klos, në afërsi të fshatit Shoshaj, ka qëlluar dy herë në ajër me armë zjarri.
Gjatë kontrollit të banesës, Policia gjeti të fshehur në frigorifer, armën e zjarrit Pistoletë “TT”, që dyshohet se autori ka qëlluar në ajër.
Materialet hetimore do t’i referohen Prokurorisë Mat, për hetime të mëtejshme.
