Këngëtarja Elvana Gjata ka folur rreth këngës së saj me të cilën konkurron në festivalin e fundvitit.
E ftuar në emisionin “Aperi Fest”, këngëtarja ka zbuluar edhe pak nga koreografia që do ketë performanca e saj.
Gjatë intervistës ajo ka zbuluar se kënga “Me tana” nuk është krijuar enkas për Festivalin e Këngës. Ajo tregoi se këtë projekt e ka realizuar një vit më parë dhe po priste momentin e duhur kur ta lançonte.
“E dëgjoja dhe kërceja, dhe teksa kërceja, qaja”, tha ajo.
Pyetur për Eurovizionin, Elvana është shprehur se para së gjithash, vjen festivali. “Eurovizioni është shumë larg”, u shpreh këngëtarja.
Për sa i përket koreografisë, janë bashkuar tre valle në një: vallja e jugut, Shqipërisë së mesme dhe e veriut. Të gjitha këto, ndërthurur me elemente moderne.
Ndërkohë në lidhje me këtë ka folur edhe koreografi Albi Nako, i cili sqaroi se çdo lëvizje është menduar në atë mënyrë, që Elvana të mos ketë probleme me zërin gjatë performancës.
