Gjatë seancës së sotme në Kuvend, deputetët kanë kërkuar që t’i drejtojnë pyetje kreut të KLP-së, Gent Ibrahimi, por nuk janë lejuar nga kryeparlamentari Gramoz Ruçi. I pari që ka reaguar ka qënë deputeti Ralf Gjoni, i cili ka theksuar të drejtën e tij për pyetje.
Ndërsa Ruçi i ka kujtuar mbledhjen e shkuar, duke shpjeguar edhe arsyet se përse kërkon pyetje me shkrim për të drejtuar seancën, e cila sipas tij zhvillohej në kushte të jashtëzakonshme.
Ai solli në kujtesë seancën e shkuar e cila zgjati nga 3 në 6 orë. Ndodhur në këto kushte, tha Ruçi, pyetjet duhen me shkrim, pasi kryetari nuk mund të improvizojë. Nga ana tjetër, një reagim është përcjellë edhe nga Myslim Murrizi, i cili ia ktheu Ruçit, duke e vënë në dijeni se gjendja e jashtëzakonshme ka përfunduar.
PJESË NGA DEBATI:
Ruçi: Çfarë ka që ngrini duart? Pyetjet bëjini me shkrim. Nuk është kërkuar debat.
Ralf Gjoni: Neni thotë që titullari paraqet raporti, nuk thotë që pyetjet duhen parashtruar me shkrim, apo me whatsapp. Deputetët e nderuar kanë të drejtë të bëjnë pyetje dhe të marrin përgjigje.
Ruçi: Po të ishim në kushte normale, po. Kemi një vendim të marrë nga Konferenca e Kryetarëve. Ndaj javën e shkuar që unë s’isha, seanca zgjati nga 3 në 6 orë. Prandaj pyetjet duhen me shkrim, se kryetari nuk mund të improvizojë.
Myslim Murrizi: Po, por gjendja e jashtëzakonshme ka mbaruar, prandaj do të doja që Kuvendi të kthehej në normalitet, dhe deputetët të marrin kohën që iu duhet për të diskutuar në lidhje me titullarët e institucioneve. Po të kishte kohë, do të kërkoja llogari edhe për KLP-në. Mblidhni konferencën e kryetarëve të vendoset normaliteti. Këtu e kishim paqen, gjysma e sallës nuk fliste.
Gramoz Ruçi: Ka përfunduar gjendja e jashtëzakonshme, por jo efektet. Do e diskutojmë shqetësimin tuaj në mbledhjen e ardhshme të KLGJ.
