Presidenti i Turqisë priti në një takim homologun e tij rus, Vladimir Putin. Pas takimit, të dy presidentët mbajtën një konferencë të përbashkët për median.
Duke vënë në dukje se mes tyre janë diskutuar cështjet rajonale, Erdogan deklaroi gjatë fjalës së tij se mbështet integritetin territorial të Irakut dhe Sirisë, ndërsa shtoi se referendumi kurd në Irak nuk ka legjitimitet.
“Si Turqia ashtu edhe Rusia, kemi konfirmuar edhe një herë vendosmërinë tonë për të vazhduar bashkëpunimin e ngushtë dhe për të ruajtur vullnetin tonë të përbashkët që konflikti i Sirisë të zgjidhet me rrugë politike.
Referendumi kurd nuk ka legjitimitet nga pikëpamja e Kushtetutës së Irakut dhe ligjit ndërkombëtar. Për fat të keq, Administrata rajonale ka bërë një gabim të madh duke organizuar referendumin. Askush nuk ka të drejtë të hedhë zjarr, të përshkallëzojë tensionet në rajonin tonë, për hir të interesave personale afatshkurtra”, tha Erdogan në rezidencën presidenciale në Ankara.
Nga ana tjetër, presidenti rus Vladimir Putin tha se me krijimin e “zonave jokonfliktuale” në Siri i ka dhënë një hov të rëndësishëm procesit të Gjenevës, ndërsa shtoi se është arritur një sukses i madh falë iniciativës dhe vullnetit të Erdogan.
