Punonjësit e policisë mbi 55-vjeç, do të lirohen nga detyra. Kështu u shpreh sot Ministri i Brendshëm, Sandër Lleshaj, në mbledhjen online të Komisionit të Sigurisë. Sipas tij, kjo do të ndodhë sapo të kalojë në Kuvend dhe të miratohet ligji i paraqitur nga Ministria e Brendshme. Më tej ai ka garantuar se të larguarit nga puna, do të trajtohen financiarisht.
“Nga radhët e policisë të largohen ose me kërkesën e vetë punonjësit të policisë, ose me vendim të autoriteteve drejtuese të saj punonjësit e policisë që kanë mbushur moshën 55 vjeç, ose që kanë plotësuar 30 vite shërbim në radhët e policisë.
Sot ne kemi në nivelin bazë të policisë oficerë që janë mbi 50 vjeç, në gradat e ulëta, në gradat nënkomisar, grada inspektorëve, që janë 60 vjeç.
Synimi është që të preket kjo fashë e gradave, njerëz që janë në terren, njerëz që duhet se s’bën të lëvizin.
Pas largimit nga radhët e policisë, këta punonjës të shtetit parashikohet të trajtohen financiarisht me 50% të pagës neto”, tha Lleshaj.
