Shkrimtari dhe Publicisti Kim Mehmet, gjatë një interviste për ‘Koha Jonë’ thotë se Edi Rama është modeli më i mirë i politikanit që gjatë këtyre viteve i morën gjithçka vendit dhe nuk i dhanë asgjë.
“Andaj edhe s’ke çka i sugjeron njeriut që të lë përshtypjen se nuk e ka kuptuar më parësoren që duhet ta dijë një burrështetas: se çfarë i ka hije të bëjë e të thotë budallai i mëhallës, nuk i ka hije të parit të shtetit, se e ka pru punën deri aty sa paraqitjet e tij publike duhet të shoqërohen me paralajmërimin: keni kujdes, është e ndaluar për adoleshentët, ngaqë folësi është i paparashikueshëm dhe mund të bëjë ndonjë sjellje të turpshme dhe të përdorë fjalorë të pistë!”,– shprehet shkrimtari i njohur.
Ai bën përgjegjës për krizën në të cilën ndodhet vendi, të gjithë ata politikanë që, sipas tij këto tri dekadat e fundit janë duke ia rrënuar të tashmen dhe të ardhmen vendit.
Ndër të tjera, ai ka bindjen se kjo krizë politike do krijojë hapësirë për ardhjen e një gjenerate të re politikanësh që do e shpëtojnë vendin nga ‘burrështetasit’ e sotëm.
Lidhur me tezën e bashkimit të trojeve shqiptare, Mehmeti shprehet se “ideali për bashkim kombëtar nuk do vdes deri sa të ketë shqiptari”, teksa thotë se nuk mund ta realizojnë politikanë “si Kryeministri i Shqipërisë, që e ‘copëzoi’ edhe atë pakë mëmëdhe që kemi”.
