Nga: Klodian Tomorri
Në fillim të viteve 80, kartelet e drogës në Kolumbi nisën të aplikojnë një metodë të re për të goditur nëpunësit e shtetit, që nuk i korruptonin dot. Denigrimin e tyre në media përmes historive të sajuara për korrupsion apo shkelje të ligjit. Bosët e drogës nuk kishin problem te blinin mediat dhe as të sajonin histori korrupsioni, kështu që në disa raste strategjia rezultonte efektive. Mafia financiare ne Shqipëri ka nisur të përdorë të njëjtat metoda.
Sa here që një figurë publike nga opozita denoncon publikisht me fakte të pakundërshtueshme aferat që mpleksin bizneset e fuqishme, menjëherë në publik lëshohen histori të sajuara për ta goditur. Vetëm se ne ndryshim nga kartelet kolumbiane, oligarkët në Shqipëri janë më pak të sofistikuar dhe sajojnë histori totalisht qesharake.
Rasti më i fundit është goditja ndaj deputetit demokrat Agron Shehaj. Ditët e fundit në treg ka nisur “papritur” te serviret historia e një vendim te Autoritetit te Konkurrencës, që ka lidhje me një transaksion mes dy shoqërish Call Center. Transaksioni është shitja e kompanisë shqiptare CC Tirana e zotëruar nga ish-deputeti Shehaj tek gjigandi botëror Comdata.
Pasi transaksioni u paraqit nga vet kompanitë në Autoritetin e Konkurrencës, Komisioni i Konkurrencës vendosi të mos e klasifikojë atë si përqendrim. Ky është vendimi qe mafia financiare po e sponsorizon si bllokimin e një afere të zezë, që tentoi të bënte ish-deputeti Shehaj.
Në fakt vendimi i Komisionit të Konkurrencës, është krejt e kundërta. Përmes tij Autoriteti i Konkurrencës është shprehur se meqenëse CC Tirana nuk zotëron pjesë të ndjeshme në tregun e Call Centerave në Shqipëri atëherë ky transaksion nuk është subjekt miratimi nga Konkurrenca. Pra mund të bëhet pa marrë miratimin e Autoritetit te Konkurrencës. Ky është ai që po serviret tinëzisht si transaksioni i zi dhe afera e deputetit Shehaj.
Në fakt sulmet e sajuara ndaj deputetit Shehaj nuk janë të rastësishme. Vitin e fundit ai ka qenë një nga deputetët më aktivë të opozitës në denoncimin dhe zbardhjen me fakte të pakundërshtueshme të disa prej aferave më të mëdha korruptive në vend. Që nga zbulimi i Skandalit të Unazës, ku u kurseu taksapaguesve shqiptarë të paktën 5 milionë euro e deri tek afera e fiskalizimit dhe denoncimi i shumë tenderave fiktivë të cilët përfitohen nga të njëjtit njerëz. Pikërisht nga këto denoncime kanë nisur dhe disa nga aksionet më të fuqishme antikorrupsion të opozitës.
Është një luftë ku janë në lojë milionë euro. Ndaj tashmë interesat okulte kanë nisur të godasin mbrapsht duke sajuar histori qesharake. Megjithatë problemi nuk janë oligarkët. As paratë që ata përdorin për të sulmuar publikisht kundërshtarët e tyre. Problemi që ka Shqipëria sot është se në politikën shqiptare zërat si Agron Shehaj janë shumë të paktë. Pasi pjesa më e madhe e politikanëve janë ose pupace ose të lidhur në interesa ekonomike me bizneset e fuqishme. Ose të dyja bashkë. Ky është problemi.
